Agosto 25, walang pasok — P-BBM

ni Mylene Alfonso @News | August 17, 2023

Idineklara ni Pangulong Ferdinand Marcos, Jr. na suspendido ang klase sa lahat ng antas ng pampublikong paaralan at sa trabaho sa mga tanggapan ng gobyerno sa Metro Manila at sa lalawigan ng Bulacan sa Agosto 25.

Ito ay upang bigyang-daan ang opening ceremonies ng FIBA Basketball World Cup 2023 na gaganapin Philippine Arena sa Bocaue, Bulacan.

Batay sa Memorandum Circular No. 27 na nilagdaan ni Executive Secretary Lucas Bersamin noong Agosto 15, bahagi rin ito ng pangako ng pamahalaan tungo sa mas malawak na partisipasyon ang publiko sa sports promotion at development.

Binigyang-diin din ng Pangulo na ang pagsususpinde sa trabaho ng gobyerno at mga klase sa mga pampublikong paaralan ay ang pagsisikap ng gobyerno na magbigay ng buong suporta at tulong sa Philippine Sports Commission (PSC) sa pagtiyak ng ligtas, maayos at matagumpay na opening ceremonies ng FIBA Basketball World Cup 2023.

Gayunman, nilinaw ng Pangulo na hindi sakop ng suspensyon ang mga ahensya ng gobyerno na may kinalaman sa paghahatid ng mga pangunahin at serbisyong pangkalusugan, kahandaan/tugon sa mga sakuna at kalamidad, at/o ang pagganap ng iba pang mahahalagang serbisyo.

Ipinauubaya naman ng Pangulo ang pagpapasya ng suspensyon sa mga pinuno ng mga pribadong paaralan at tanggapan.

P120.5B kita ng gobyerno — DBM.. Dagdag-buwis sa 2024, tuloy

ni Mylene Alfonso @News | August 17, 2023

Nanindigan ang economic team ng administrasyong Marcos kaugnay sa pagtataas ng buwis para sa susunod na taon.

Ito ang ibinahagi ni Finance Sec. Benjamin Diokno nang humarap sa 2024 National Expenditure Program (NEP) budget briefing ng Development Budget Coordination Committee (DBCC) sa Senado.

Sinabi ni Diokno na patuloy silang makikipagtulungan sa Kongreso sa kinakailangang paniningil ng karagdagang buwis para na rin sa mabilis na paglago ng ekonomiya ng bansa sa pamamagitan ng mga kinakailangang reporma.

Kasama aniya rito ang pagpapasa ng mga natitirang tax reform packages ng nakalipas na administrasyon at mga bagong tax measures sa ilalim ng kasalukuyang Marcos administration.

Ang mga itutulak na dagdag na buwis ay ang Package 4 o ang Passive Income and Financial Intermediary Taxation kabilang ang Excise tax sa single-use plastic,

Rationalization of mining fiscal regime, Motor vehicle road users tax, Excise tax para sa matatamis na inumin at junk foods, Buwis sa pre-mixed alcohol at VAT sa digital service providers.

Nabatid na target na maaprubahan ngayong 19th Congress ang pitong panukala para sa mga nabanggit na dagdag na buwis bilang suporta sa medium-term fiscal framework.

Idinagdag pa ni Diokno na kapag naipatupad ang mga naturang tax measures ay makakalikom ang gobyerno ng P120.5 bilyon na dagdag sa kita para sa taong 2024.

Kapag nagtuluy-tuloy ay tataas pa aniya ang makokolektang buwis dito sa P152.2 bilyon sa 2025 at P183.2 bilyon sa 2026.

Samantala, inihayag naman ni Senador Chiz Escudero na bakit hindi tingnan ang luxury taxes kung magpapataw ng mga bagong buwis.

Ngunit kapag dapat nang ipatupad aniya ang mga bagong buwis, sinabi niyang mas gugustuhin niyang taasan ang luxury tax sa halip na mga road users, online, o value-added taxes.

Matatandaang sinabi ni Escudero na dapat ayusin muna ang tax collection sa halip na magpataw ng mga bagong buwis at bigyan ng dagdag-pasanin ang mga Pinoy.

P403M gastos sa mga biyahe ni P-BBM

ni Mylene Alfonso @News | August 17, 2023

Idinepensa ng Palasyo ang foreign at local travels ni Pangulong Ferdinand Marcos, Jr., na umabot sa mahigit P403 milyon noong nakaraang taon kung saan ang mga nasabing biyahe ay layuning gampanan ang kanyang mga tungkulin bilang pinuno ng bansa.

Una nang sinabi ng Commission on Audit (COA) sa kanilang ulat na umabot sa P403,087,594.93 ang mga naging foreign at local travels ng Pangulo sa kanyang unang anim na buwan, na tumaas ng P367,052,245.96.

Sinabi ng COA na kasama sa mga gastusin ang transportasyon, travel per diem, ferriage, at mga kaugnay na gastos.

Nabatid na ang mga foreign at local travels noong 2021 sa ilalim ng administrasyon ng kanyang pinalitan na si Rodrigo Duterte ay nasa P36,791,902.14 lamang, batay sa ulat.

"Significant increase of P367,052,245.96 is due to the official travels relative to the foreign summits and state visits attended by the President during the year in Singapore, Indonesia, United States of America, Cambodia, Thailand, and Belgium," ayon sa state auditors.

Gayunman, inihayag ni Press Secretary Cheloy Garafil na ang mga paglalakbay na ito ay dumating sa panahon na unti-unting inalis ang mga economic restrictions sa Pilipinas noong nakaraang taon.