Inaprub sa 2023 budget, 'di pa rin nagagamit.. P3B ayuda sa tsuper, ibigay na

ni Mylene Alfonso @News | August 22, 2023

Sa gitna ng patuloy na pagtaas ng langis, dapat na umanong ilabas ng Department of Transportation (DOTr) at iba pang kaukulang ahensya ang P3 bilyong subsidy para sa mga tsuper ng public utility vehicle (PUV).

Ginawa ni Poe ang panawagan bilang tugon sa anunsyo ng Department of Budget and Management (DBM) na dapat ilabas muna ang joint memorandum circular na nilagdaan ng mga kinauukulang ahensya bago mailabas ng ahensya ang pondo para sa fuel subsidy na inihain sa 2023 budget.

Kasunod din nito ang panawagan ng senadora sa kaparehong araw kung saan umapela ang grupo ng taxi operators na itaas ang flagdown rate mula P40 hanggang P70 dahil sa pagtaas ng mga produktong petrolyo.

“Inilatag na natin sa 2023 budget ang P3 billion fuel subsidy na hindi pa rin nagagamit kahit halos matatapos na ang taon. The DOTr must immediately issue the memorandum circulars and execute the memorandum of agreement necessary for the release of the long overdue fuel subsidy,” pahayag ni Poe.

"We understand the plight of our drivers and operators amid the series of oil price hike. If we hike the fare, then it's the public who will be burdened by this. Would the public be able to pay for it when a fare hike was implemented just last year?” tanong ng senadora.

Dagdag pa ni Poe na dapat maghanap din ang DOTr at ang Land Transportation Franchising and Regulatory Board ng iba pang alternatibo para makatulong sa PUV sector at commuters.

Apela kay Mayor Binay: EMBO, iturnover na sa Taguig

ni Mylene Alfonso @News | August 21, 2023

Kinatigan ni dating Press Secretary Trixie Cruz Angeles ang posisyon ng Taguig City na hindi kailangan ng writ of execution para iimplementa ang takeover ng Taguig sa EMBO barangays sa basehang hindi ejectment case ang kaso at malinaw ang desisyon ng Korte Suprema na turnover ang dapat na gawin ni Makati City Mayor Abby Binay.

Sa kanyang vlog post na Luminous, hinimay ni Angeles ang usapin ng turf war sa pagitan ng dalawang lungsod.

Ani Angeles, na isang abogado, kung titingnan ang 53 pahinang desisyon ng SC sa nasabing kaso ay walang basehan ang argumento ni Binay na magkaroon muna ng transition period, aniya, “stop exercising jurisdiction” ang malinaw na utos ng hukuman kaya turnover ng hurisdiksyon ang dapat na gawin ng alkalde.

Tinuring din ni Angeles na walang legal basis ang nakuhang opinyon ng Makati City mula sa Office of Court Administrator (OCA) na nagsasabing kailangan muna ng writ of execution.

Ipinaliwanag ni Angeles na “stop exercising jurisdiction” agad ang desisyon ng Supreme Court sa territorial dispute dahil sa umpisa pa lamang ng kaso ay mayroon nang ipinalabas na Temporary Restraining Order (TRO) ang Pasig City Regional Trial Court.

Sa July 8, 2011 decision ni RTC Pasig City Branch 153 President Judge Briccio Ygaña, pinaboran nito ang Taguig sa inihaing Civil Case No. 63896 na Judicial Confirmation of the Territory and Boundary Limits of Taguig, iniutos ng Regional Trial Court na ang Fort Bonifacio Military Reservation kabilang ang Parcels 3 at 4, Psu-2031 ay kumpirmadong bahagi ng territory ng Taguig.

Ayon kay Angeles noong 1994 pa ay dapat hindi na nag-exercise ng jurisdiction ang Makati sa EMBO barangays dahil mayroon nang TRO sa umpisa pa lamang ng litigation ng kaso, kaya sa naging desisyon ng SC noong 2022 ay ang kautusan nito ay turnover ng jurisdiction matapos manalo na ang Taguig.

Sinabi rin nito na mas mainam na iturnover na ni Mayor Binay ang EMBO Barangays habang magkaroon ng arrangement kay Mayor Lani Cayetano para sa mga ari arian.

Made in Australia — Sen. Tulfo.. Pera ng 'Pinas na imported, tatalupan

ni Mylene Alfonso @News | August 20, 2023

Kinuwestiyon ni Senador Raffy Tulfo ang Bangko Sentral ng Pilipinas (BSP) kung bakit ang pagpapagawa ng bagong 1,000-peso note ay ikinontrata nito sa Australia.

“Ibig sabihin, ang sarili nating pera ay imported at made in Australia,” dagdag pa ni Tulfo.

Kinuwestiyon din ng senador ang 'pang-aarbor' umano ng BSP sa Philippine Statistics Authority (PSA) sa pag-imprenta ng national IDs.

Sa naging pagdinig ng Senate Committee on Finance noong Agosto 16, ipinagtataka ni Tulfo kung bakit ang BSP ang gagawa nito kung saan ang trabaho ay mag-imprenta ng pera.

Nakialam aniya ang BSP sa pagpapa-imprenta ng mga ID na nagkakahalaga ng P28 bilyon.

Magpapasa ng resolution in aid of legislation si Tulfo upang imbestigahan ang mga nasabing isyu laban sa BSP at AllCard.

“Ang masaklap, matapos maipaarbor ng PSA sa BSP ang proyekto, ang kontrata ay naipasa naman sa AllCard, Inc. kahit pa ang kumpanyang ito ay dati nang may problema sa iba't ibang ahensya ng gobyerno, tulad ng delay sa pagpapatupad sa kontrata,” paliwanag ni Tulfo.

“Ngayon, sa muli, delayed ulit ang AllCard sa pagpapatupad sa kontrata naman nito sa BSP. Pero hindi lang delayed ang problema ng AllCard kundi nakagawa pa ito ng malaking bulilyaso,” aniya pa.

Ani Tulfo, pumalpak sila sa disenyo ng QR code dahil napakaliit nito at hindi sapat para makapag-store ng mga mahahalagang impormasyon. Dahil dito, may posibilidad na sirain umano nila ang milyun-milyon nang naimprentang mga card para sa bagong disenyo.

Bunsod nito, nakatakdang magpasa ng resolution in aid of legislation si Tulfo para imbestigahan ang mga naturang isyu laban sa BSP at AllCard