Raid sa mga bodega, tuloy — P-BBM.. Smugglers at hoarders ng bigas, kasuhan

ni Mylene Alfonso @News | August 30, 2023

Ipinag-utos ni Pangulong Ferdinand Marcos, Jr. sa Bureau of Customs (BOC) na ipagpatuloy ang pagsalakay sa mga bodega upang sugpuin ang mga hoarder at ilegal na importer ng bigas.

Sa press briefing sa Malacañang nitong Martes, sinabi ni BOC Commissioner Bienvenido Rubio na dinodoble ng BOC ang kanilang pagsisikap na tugisin ang mga ilegal na nag-aangkat ng mga produktong pang-agrikultura sa pamamagitan ng pag-validate sa lahat ng mga bodega, partikular sa mga inangkat na bigas.

"Ayon sa direktiba ng Pangulo, ang gagawin natin ay i-validate natin ang lahat ng warehouses na nag-iimbak ng mga imported na bigas at pagkatapos ng validation ay maglalabas tayo ng letters of authority para magsagawa ng inspeksyon sa mga warehouses na ito,” ani Rubio.

Nagbigay din siya ng mga update sa mga pagsisikap ng ahensya, kung saan inulit niya ang kamakailang sorpresang inspeksyon sa mga bodega ng bigas sa Bulacan.

Ang tatlong bodega na isinailalim sa inspeksyon ay ang Great Harvest Rice Mill Warehouse, na matatagpuan sa Intercity Industrial Complex; San Pedro Warehouse Intercity Industrial Complex; at FS Rice Mill Warehouse.

Ang mga sako ng bigas ayon sa pagkakasunod ay natagpuan sa nasabing mga bodega ay inangkat mula sa Vietnam, Cambodia, at Thailand na may inisyal na tinatayang kabuuang halaga na P505 milyon.

Ang mga may-ari at operator ng nasabing mga bodega ay pinagbawalan na kunin ang mga paninda maliban na lamang kung makapagpakita sila ng mga kinakailangang dokumento sa kanilang pag-aangkat ng bigas.

Binigyan sila ng hanggang Setyembre 8, 2023 upang patunayan na binayaran nila ang mga kinakailangang tungkulin para sa mga kalakal.

Tiniyak ni Rubio na sasampahan ng kaso ang mga salarin, kung mapatutunayang may kasalanan ang mga may-ari at operator ng nasabing mga bodega.

Binanggit din niya ang patuloy na pakikipagtulungan ng BOC sa Department of Justice (DOJ) sa pagsasampa ng kaso laban sa mga smuggler na nahuli.

Vendors, dedma sa price guide ng school supplies

ni Mylene Alfonso @News | August 30, 2023

Naniniwala si Senadora Imee Marcos na magsasamantala ang mga negosyante sa unang linggo ng pagbubukas ng klase lalo na’t magkukumahog ang mga estudyante at mga guro na kumpletuhin ang kanilang mga gamit pang-eskwela.

Dahil dito, hinikayat ni Marcos ang Department of Trade and Industry (DTI) na paigtingin pa ang mga biglaang inspeksyon sa mga nagtitinda ng school supplies na lumalabag sa bagong-presyong gabay nito na isang buwan pa lamang ang nakalilipas.

“Iniisnab ng mga tindera ang price guide ng DTI," wika ni Marcos kaugnay sa 'Gabay sa Pamimili ng School Supplies sa 2023' ng kagawaran.

Sa isinagawang pagmo-monitor ng opisina ng senador sa presyo ng school supplies sa ilang palengke sa Metro Manila noong weekend at Lunes, ang mga notebook ay nagkakahalaga ng P23 hanggang P60 bawat isa, o hanggang P8 higit pa kaysa sa P23-P52 na nakalista sa gabay-presyo ng DTI.

Mas mura ang pad paper ayon sa gabay-presyo ng DTI, na nagkakahalaga ng P20-P28, pero umabot ng P35 lalung-lalo na sa mga palengke sa Caloocan at Rizal.

Ang mga krayola na iba't ibang dami ay nagkakahalaga ng P30-P100 kada lalagyan, samantalang sa gabay-presyo ng DTI ay P24-P69 lamang.

Gayunman, mas mababang presyo, tulad ng iba't ibang lapis at ballpen, ay mabibili sa P7-P11, kumpara sa listahan ng DTI na nagkakahalaga ng P11-P17.

Ang mga naghahanap ng mura sa Divisoria na bumibili nang maramihan ay makakakita na ang regular na mga notebook na dati'y nagkakahalaga ng P180-P200 kada ream, ngayon ay P250, samantalang ang spiral na mga notebook na dati'y nagkakahalaga ng P180-P220 kada ream ay nagkakahalaga ng hanggang P300.

Pinuri naman ni Marcos ang DTI sa mga biglaang inspeksyon nito sa Divisoria at iba pang palengke sa nakaraang dalawang linggo ngunit sinabi na pagkatapos ng inspeksyon, muling nagtaasan ang mga presyo.

Gilas Pilipinas, pang-world class — P-BBM

ni Mylene Alfonso @News | August 27, 2023

Itinuring ni Pangulong Ferdinand Marcos, Jr. na pang-world class ang Gilas Pilipinas sa pakikipaglaban sa Dominican Republic sa pagbubukas ng 2023 Fiba World Cup sa Philippine Arena na nasa Bocaue, Bulacan, kamakalawa ng gabi.

Ito'y bagama't tinalo ng Dominican Republic ang Gilas Pilipinas sa iskor na 87-81.

Sinabi ni Marcos na pinatunayan ng Gilas Pilipinas na ang Filipino athleticism ay pang-world class.

“A valiant effort by Gilas Pilipinas! Already you have proven that Filipino athleticism is world class,” ani Marcos.

“The nation stands in full support of your 2023 FIBA World Cup journey. Congratulations as well to every attendee who helped set a new crowd record!” pahayag ng Pangulo.

Samantala, hawak naman ngayon ng Pilipinas ang world record na may pinakamaraming nanood sa World Cup na umabot sa mahigit 38,000 katao kumpara sa Toronto, Canada na nasa 32,000.