Lodging Inn sa Maynila, nasunog

ni Mylene Alfonso @News | September 7, 2023

Nasunog ang bahaging rooftop ng isang lodge kahapon ng umaga sa Globo de Oro, Quiapo, Maynila.

Ayon sa Manila Bureau of Fire Protection (BFP), alas-6:17 ng umaga nang magsimula ang sunog sa 816 Shairah Lodge na matatagpuan sa Globo de Oro St., Bgy. 834, Quiapo.

Walang idineklarang alarma ngunit alas-7:18 ng umaga nang makontrol ang apoy at alas-7:53 ng umaga nang ideklarang fire-out.

Sa imbestigasyon, nagsimula umano ang apoy sa bahagi ng rooftop ng gusali. Tinaya ng BFP na umabot sa P225,000 halaga ang napinsalang ari-arian. Wala namang iniulat na namatay o nasugatan sa naganap na sunog.

Patuloy na iniimbestigahan ang sanhi ng sunog.

Membership sa boy, girl scouts at red cross, boluntaryo.. 'No collection policy' sa iskul

ni Mylene Alfonso @News | September 6, 2023

Isinusulong ni Senador Raffy Tulfo ang panukalang ‘no collection policy’ sa mga pampublikong elementarya at sekondaryang paaralan.

Sa paghahain ng Senate Bill No. 2420, iginiit ni Tulfo na ang mga nag-aaral sa pampublikong paaralan ay mula sa mga pinakamahihirap na pamilya sa bansa at maaaring panghinaan lang sila ng loob na ituloy ang kanilang edukasyon kapag nagpataw pa ng karagdagang bayarin para sa kanila.

Sa ilalim ng SB No. 2420, hindi maaaring kumolekta ng bayad mula sa mga mag-aaral na nag-enroll sa pre-school hanggang Grade IV, sa enrollment period at buong school year.

Para sa mga lampas Grade IV na, walang anumang uri ng koleksyon ang dapat gawin sa panahon ng enrollment at unang buwan ng mga klase. Simula sa ikalawang buwan, ang mga kontribusyon para sa ilang membership lamang ang maaaring kolektahin, ngunit boluntaryo lamang at hindi dapat hilingin. Kabilang dito ang mga boy/girl scouts at red cross membership.

Ang panukalang batas ni Tulfo ay umaayon sa pangako ng bansa sa pagkamit ng Education For All (EFA) Plan 2015 at ang Millennium Development Goals (MDGs), partikular na tungkol sa partisipasyon ng elementarya.

Kahit nahuli-cam.. Ex-cop, 'di inaresto dahil wala raw baril — cyclist

ni Mylene Alfonso @News | September 6, 2023

Bagama't nakita sa viral video na nagkasa ng baril, hindi inaresto ng mga miyembro ng Quezon City Police District (QCPD) ang dating pulis na si Wilfredo Gonzales dahil hindi umano nila nakita ang baril na ginamit nito sa panunutok sa siklistang si Allan Bandiola noong Agosto 8.

Ito ang lumitaw sa isinagawang pagdinig kahapon ni Senador Ronald "Bato" dela Rosa, chairman ng Senate Committee on Public Order and Dangerous Drugs.

"Sabi ni Sir Adan, 'Hindi namin pwedeng arestuhin si Ginoong Gonzales, wala naman kaming nakitang baril' Ganito na lang, sabi niya, tatawag tayo sa traffic sector para maayos 'to at magawan ng incident report," salaysay ni Bandiola sa komite.

Ayon pa kay Dela Rosa, dapat iginiit ni Bandiola sa mga pulis na may baril si Gonzalez.

"Dapat sinumbong mo, may baril 'yan, kinasahan ako," dagdag pa ng senador na dating hepe ng PNP.

Iginiit naman umano ni Bandiola sa mga pulis na may baril si Gonzales pero sinabi ng mga pulis na rumesponde sa insidente na hindi nila ito maaaring arestuhin.

Wala naman sa naturang pagdinig ang mga sinasabing pulis ni Bandiola.

Inamin naman ni Gonzales na isinuko ang kanyang baril sa Galas Police Station matapos siyang sabihan ng mga imbestigador.

Samantala, inihayag naman ni Police Firearms and Explosives Office chief Brig. Gen. Paul Kenneth Lucas na agad naman binawi ang License To Own and Possess Firearms (LTOPF) ni Gonzales matapos mag-viral sa social media ang video ng kanyang pananakit at pagkasa ng baril kay Bandiola.

Matatandaang Agosto 8 nang mangyari ang iringan sa kalye nina Gonzales at Bandiola ngunit noong Agosto 27 lamang lumabas ang viral video na nakitang naglabas ng baril si Gonzales at ikinasa ito sa harap ni Bandiola.

Nagsampa na ng reklamong alarm and scandal ang Quezon City Police District laban kay Gonzales.

Natanggal na rin si Gonzales sa pagiging empleyado ng Korte Suprema.

Bukod dito, nais ng pamunuan ng PNP na isauli niya ang natanggap na retirement benefits matapos matuklasan na may mga kaso pa siyang kinakaharap nang umalis sa serbisyo.

0Plano rin ng PNP na sampahan pa ng ibang reklamo si Gonzales kabilang ang grave threat.