P-BBM, sapul.. P20 na bigas, 'di makatotohan — Ex-P-Duterte

ni Mylene Alfonso @News | September 8, 2023

Naniniwala si dating Pangulong Rodrigo Duterte na "daydreaming" lamang ang presyo na P20 kada kilo ng bigas dahil sa batas ng supply at demand sa pandaigdigang merkado.

Sinabi pa ni Duterte na maaaring umabot pa sa P90 kada kilo ang retail price ng bigas sa gitna na rin ng pagtaas ng presyo ng mga pataba at iba pang kagamitan sa sakahan.

"In the fullness of God’s time aabot talaga ito ng mga nubenta, walang bumaba, ang inflation will always go up as the years would come. Wala ng bumaba 'yan," ani Duterte.

Dapat aniyang tanggapin ng mga Pilipino ang katotohanan na walang paraan para bumaba ang presyo ng bigas sa P20 kada kilo, na masyadong mababa at hindi makatotohanan, kung ikukonsidera ang kasalukuyang sitwasyon sa merkado.

"By our standard, P20 is masyadong mababa ‘yan and rice-producing countries have also limited the volume of rice they could export as they also do not have enough land to plant rice on. It is development, from forestal to agriculture, then to commercial," sabi ni Duterte.

Dagdag pa ni Duterte, kailangan na maging handa ang gobyerno na mawalan nang hindi bababa sa P3 bilyon para makabili ng bigas ng mas mataas na presyo at maibenta sa mga tao sa mas mababang halaga para maiwasan ang posibleng “rebolusyon” na bunga ng krisis sa pagkain.

Matatandaang noong panahon ng kampanya isa sa mga campaign promise ni Pangulong Ferdinand Marcos, Jr., ang P20 kada kilo ng bigas.

P-BBM sa ASEAN leaders: Walang dapat maghari-harian sa South China Sea

ni Mylene Alfonso @News | September 7, 2023

Direktang sinabi ni Pangulong Ferdinand Marcos, Jr. noong Miyerkules kay Chinese Premier Li Qiang na igigiit ng Pilipinas ang mga karapatan sa soberanya hinggil sa mga alitan sa teritoryo sa South China Sea.

Ang nasabing posisyon ay batay sa depinisyon ng United Nations Convention on the Law of the Sea (UNCLOS).

Sa 43rd Association of Southeast Asian Nations Summit (Asean), nagpahayag ng pasasalamat si Marcos sa China para sa pakikipagtulungan nito sa Asean, at sinabing nakatulong ito sa paglago ng rehiyon.

Gayunman, ang paglago na iyon ay maaari lamang maging posible sa kapayapaan.

Samantala, hindi umano dapat na pumayag ang Association of Southeast Asian Nations na may maghari-harian na bansa sa South China Sea.

Sa intervention ni Pangulong Marcos sa 43rd ASEAN Summit Retreat dito, inihayag niya na dapat na pumalag ang ASEAN na mapasailalim ang international order sa puwersang ginagamit para sa hegemonic ambition.

Aniya, nahaharap sa isang malaking hamon ang ASEAN.

"History will ultimately judge whether the supremacy of the rule of law prevails, ushering in an era where all nations truly stand as equals, independent and unswayed by any single power,” paliwanag ni Marcos.

"The challenge for us remains that we should never allow the international order to be subjected to the forces of might applied for a hegemonic ambition," hirit pa ng Pangulo.

Dagdag pa niya na committed ang Pilipinas na makipagtulungan sa ibang bansa para maisulong ang freedom of navigation at overflight sa South China Sea na nakabase sa international law kasama na ang 1982 UNCLOS.

ID na may piktyur ng unggoy nakalusot sa SIM registrantion

ni Mylene Alfonso @News | September 7, 2023

Nabuking sa pagdinig ng Senado na kahit mukha ng unggoy ay kayang lumusot sa SIM card registration matapos makalusot ang mukha ng nakangiting unggoy na nakalagay sa identification card na kunwaring nagpaparehistro.

Sa pagdinig nitong Martes ng Senate Committee on Public Services na pinamumunuan ni Senador Grace Poe kaugnay sa implementasyon ng SIM Registration Law, ibinunyag ni National Bureau of Investigation-Cybercrime Division Chief Jeremy Lotoc na bumili ang kanyang grupo ng mga SIM card sa iba't ibang telco at sinubukan nila itong irehistro gamit ang ID na may mga mukha ng hayop at iba't iba ang pangalan.

"We entered the face of an animal and different names. Natanggap pa rin," pahayag ni Lotoc, na nagpakita ng ID na may mukha ng nakangiting unggoy.

Sinubukan din nilang i-testing ito gamit ang iba't ibang telecommunications company noong Lunes nang gabi bilang bahagi ng kanilang imbestigasyon.

Ayon sa opisyal, nahihirapan ang mga awtoridad na hanapin ang mga suspek na gumagamit ng SIM card sa iregularidad dahil sa hindi maaasahang impormasyon na nakalagay tungkol sa taong nakarehistro na may-ari ng SIM.

Marami umanong iniwasan ang implementing rules and regulation sa SIM Regulation Act tulad ng Data Privacy Law.

Dahil dito, kaunting detalye lang umano ng aplikante ang kanilang hinihingi.

Bukod sa mababa rin umano ang parusa sa lalabag.

Ayon sa National Telecommunication Commission, sa kabila ng SIM Registration Act ay nakatanggap pa rin sila ng 45,000 na reklamo sa text scam.

Bunsod nito, inirekomenda ni Poe na amyendahan ang IRR ng batas upang maisama ang facial recognition.

"It's actually looking like what we have now is not really sufficient so we will have to go back to the drawing board and probably with the cooperation of the NTC, maybe we can amend the IRR," diin ni Poe.

Nagsagawa ng pagdinig ang komite dahil sa patuloy na mga reklamo ng text scam sa kabila ng ipinatupad na batas na SIM registration.

"Gumawa tayo ng batas pero mukhang nagkukulang sa implementasyon," hirit pa ng senadora.