Hurisdiksyon ng hukuman ang krimen na naganap sa teritoryo ng ‘Pinas

ni Atty. Persida Rueda-Acosta @Magtanong Kay Attorney | May 19, 2025

Dear Chief Acosta,

May hurisdiksyon ba ang mga hukuman natin kung ang krimen ay kinasasangkutan ng dalawang banyaga na nagsaksakan sa loob ng isang pambanyagang pampasaherong barko habang ito ay nakadaong pa sa pantalan sa Maynila? — Don

---

Dear Don, 

Ang sagot sa iyong katanungan ay matatagpuan sa mga probisyon ng ating batas at kaugnay na kaso. Hinggil dito, nakasaad sa ikalawang Artikulo ng Act No. 3815, o mas kilala sa tawag na “the Revised Penal Code”, ang sakop ng aplikasyon ng ating mga batas kriminal:

“Article 2. Application of its provisions. — Except as provided in the treaties and laws of preferential application, the provisions of this Code shall be enforced not only within the Philippine Archipelago, including its atmosphere, its interior waters and maritime zone, but also outside of its jurisdiction, against those who: xxx.” 

Ayon sa nakasaad na probisyon ng batas, ang mga probisyon ng Kodigo na ito na siyang tumutukoy sa mga batas kriminal ay ipinatutupad hindi lamang sa loob ng kapuluang Pilipinas, ngunit maging sa kanyang atmospera, mga panloob na katubigan at maritime zone. 

Dagdag pa sa kasong People vs. Wong Cheng (G.R. No. 18924, 19 October 1922) sa panulat ni Honorable Associate Justice Norberto Romualdez, binigyang-linaw ng Kataas-taasang Hukuman ang sagot sa katanungan patungkol sa hurisdiksyon ng ating mga korte sa mga krimeng nangyari sa loob ng pambanyagang barko habang nakadaong sa ating mga pantalan o dagat:

“The point at issue is whether the courts of the Philippines have jurisdiction over a crime, like the one herein involved, committed aboard merchant vessels anchored in our jurisdictional waters.

There are two fundamental rules on this particular matter in connection with International Law; to wit, the French rule, according to which crimes committed aboard a foreign merchant vessel should not be prosecuted in the courts of the country within whose territorial jurisdiction they were committed, unless their commission affects the peace and security of the territory; and the English rule, based on the territorial principle and followed in the United States, according to which, crimes perpetrated under such circumstances are in general triable in the courts of the country within whose territory they were committed. Of this two rules, it is the last one that obtains in this jurisdiction, because at present the theories and jurisprudence prevailing in the United States on this matter are authority in the Philippines which is now a territory of the United States.” 

Samakatuwid, gamit ang nabanggit na batas at kaugnay na kaso, ang mga krimen na isinagawa sa mga barkong pangkalakalan, pambanyaga man o lokal, na nakadaong sa ating nasasakupan na mga tubig ay maaaring litisin ng ating mga hukuman. Ito ay batay sa prinsipyong teritoryal, at ang patakarang Ingles na pinagtibay sa Pilipinas, na sinasabing ang mga krimeng ginawa sa mga pangkalakalang banyagang sasakyang-dagat ay karaniwang maaaring litisin sa mga hukuman ng bansa sa loob ng teritoryo kung saan naganap.

Sa iyong naisalaysay, bagaman kapwa banyaga ang sangkot sa naturang saksakan na naganap sa isang pambanyagang pampasaherong barko, dahil ang barko ay nanatiling napapaloob sa ating mga karagatan, nanatili ang hurisdiksyon ng ating bansa na litisin ang nasabing kasong kriminal. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Mga benepisyo ng Employees’ Compensation Program

ni Atty. Persida Rueda-Acosta @Magtanong Kay Attorney | May 18, 2025

Ang unang araw ng Mayo kada taon ay ginawang piyesta opisyal bilang pagkilala sa ating mga manggagawa. 

Bilang pagtanaw sa kanilang mga sakripisyo, patuloy ang Kongreso sa paggawa ng mga batas para maski papaa no ay mabigyan ng alwan ang ating sektor ng mga manggagawa. Kasama na rito ang Employees’ Compensation Program (ECP). Ang ECP ay isang programa ng pamahalaan na nagbibigay ng benepisyo sa lahat ng manggagawa o sa kanilang mga benepisyaryo kapag ang mga ito ay nagkaroon ng kapansanan, pagkakasakit, nagkaroon ng pinsala, o namatay nang may kinalaman sa pagtatrabaho. 

Ang ECP ay ipinatutupad ng Employees’ Compensation Commission (ECC), isang government corporation na kabahagi ng Department of Labor and Employment (DOLE) para sa koordinasyon na may kinalaman sa polisiya at gabay. Sakop ng ECP ang mga sumusunod na manggagawa:

1. Mga empleyado sa pribadong sektor na sapilitang miyembro ng Social Security System (SSS), kabilang ang mga sea-based Overseas Filipino Workers (OFWs) at mga kasambahay. 

2. Mga empleyado ng gobyerno na sapilitang miyembro ng Government Service Insurance System (GSIS), kasama ang mga uniformed personnel mula sa Armed Forces of the Philippines, Philippine National Police (PNP), Bureau of Jail and Management Penology (BJMP), Bureau of Fire Protection (BFP), at Philippine Coast Guard (PCG).

3. Aktibong self-employed members ng SSS.

Ang kompensasyon sa ilalim ng ECP ay epektibo lamang kapag ang pagkakasakit, pinsala, o kamatayan ay work-connected o konektado sa trabaho. Kailangan din na kasama ito sa mga compensable diseases na nasa listahan ng Occupational Diseases na itinakda ng ECP. Kapag ang sakit  ay wala sa listahan, kailangan na mapatunayan na ang panganib ng pagkakasakit ay tumaas dahil sa kondisyon ng pagtatrabaho. Ito ay ang tinatawag na “Increased Risk Theory.”

Kapag naman ang pinsala, pagkakasakit, pagkakaroon ng kapansanan, o sanhi ng kamatayan ay dulot ng pagkalasing (intoxication), sinasadyang pagsakit sa sarili o ng ibang tao, sadyang pagkitil ng sariling buhay o ng ibang tao, o dulot ng kilalang kapabayaan, ang nasabing empleyado o ang kanyang benepisyaryo ay hindi maaaring makakuha ng kompensasyon mula sa ECC.

Ang mga benepisyo mula sa EC Program ay ang mga sumusunod:

1. Sickness/Disability Benefits 

Ang binabayaran dito ay hindi ang pagkakasakit kundi ang kawalang kapasidad na makapagtrabaho dahil sa tinamong pinsala o kapansanan.

2. Medical Benefits 

Kasama rito ang reimbursement ng gastusin ng mga gamot para sa tinamong pinsala, bayad sa medical care, hospital care, surgical expenses, at bayad para sa rehabilitation appliances at supplies. Subalit, ang medical services ay limitado sa ward services ng mga ospital na akreditado ng Department of Health (DOH).

3. Carers’ Allowance 

Ang supplemental pension na P1,000.00 kada buwan ay ibinibigay sa mga pensioners sa ilalim ng ECP na napinsala dahil sa work-connected partial permanent disability o permanent total disability.

4. Rehabilitation Services

KaGabay Program (Katulong at Gabay sa Manggagawang May Kapansanan), kabilang ang physical restoration, skills training, at entrepreneurship training na naglalayon mabigyan ang mga occupationally-disabled workers na mabigyan ng kabuhayan.

5. Death Benefit 

Ang mga benepisyaryo ng isang namatay na empleyado ay makatatanggap ng income benefit kapag ang kapamilyang empleyado ay namatay dulot ng work-related injury o sickness. Matatanggap nila ang income benefit na ito umpisa ng kanyang kamatayan at magpapatuloy ito hanggang sa sila ay may karapatang makatanggap nito. 

6. Funeral benefit 

Mayroong benepisyong Php30,000.00.

Karapatan ng mga telecommuting employee

ni Atty. Persida Rueda-Acosta @Magtanong Kay Attorney | May 17, 2025

Dear Chief Acosta,

Isa akong solo parent at ang isa sa mga kinokonsidera ko sa paghahanap ng trabaho ay ang pagkakaroon ng tinatawag na telecommuting program sa isang kumpanya. Masuwerte naman ako na sa kasalukuyan kong trabaho ay may ganitong programa, at pinayagan ako na magamit ito. Dahil dito, nais ko lamang malaman kung may batas ba na gumagabay sa mga katulad kong telecommuting employee sa isang pribadong kumpanya patungkol sa pantay na pagtrato mula sa aming employer? Salamat sa iyong magiging kasagutan.

— Betchay

---

Dear Betchay,

Matatagpuan ang kasagutan sa iyong katanungan sa Seksyon 5 ng Republic Act (R.A.) No. 11165, o “An Act Institutionalizing Telecommuting as an Alternative Work Arrangement for Employees in the Private Sector,” o mas kilala sa tawag na, “Telecommuting Act,” kung saan nakasaad na:

“Section 5. Fair Treatment. -- The employer shall ensure that the telecommuting employee are given the same treatment as that of comparable employees are given the same treatment as that of comparable employees working at the time employer’s premises. All telecommuting employee shall:

(a) Receive a rate of pay, including overtime and night shift differential, and other similar monetary benefits not lower than those provided in applicable laws, and collective bargaining agreements.

(b) Have the right to rest periods, regular holidays, and special nonworking days.

(c) Have the same or equivalent workload and performance standards as those of comparable worker at the employer’s premises.

(d) Have the same access to training and career development opportunities as those of comparable workers at the employer’s premises, and be subject to the same appraisal policies covering these workers.

(e) Receive appropriate training on the technical equipment at their disposal, and the characteristics and conditions of telecommuting.

(f) Have the same collectible rights as the workers at the employer's premises, and shall not be barred from communicating with workers’ representatives.

The employer shall also ensure that measures are taken to prevent the telecommuting employee from being isolated from the rest of the working community in the company by giving the telecommuting employee the opportunity to meet with colleagues on a regular basis, and opportunity to meet with colleagues on a regular basis, and allowing access to company information.”

Ang polisiya ng ating pamahalaan sa pagpapatupad ng R.A. No. 11165, at nasusulat sa Seksyon 2 kung saan nabanggit na, nirarapat na pagtibayin ang trabaho bilang pangunahing puwersang makaaapekto sa ating ekonomiya. Sa layuning ito, dapat maprotektahan ang mga karapatan ng mga manggagawa at itaguyod ang kanilang kapakanan, lalo na sa panahon ng teknolohikal na pag-unlad na nagbukas ng mga bago at alternatibong paraan para sa mga empleyado upang maisagawa ang kanilang trabaho tulad ng telecommuting, at iba pang naibabagay na kaayusan sa trabaho.

Kung kaya, pinapayagan na ang mga nasa pribadong sektor ay magkaroon ng tinatawag na telecommuting program na maaaring tanggapin ng boluntaryo ng mga empleyado. Ganoon pa man, ang nasabing programa ay nararapat na sumunod pa rin sa ating batas na sumasakop sa proteksyon ng karapatan ng empleyadong Pilipino.

Dahil dito, at bilang kasagutan sa inyong katanungan, malinaw na nakasaad sa Seksyon 5 ng R. A. No. 11165 na ang mga telecommuting employees ay nararapat na mabigyan ng pantay na trato katulad ng mga empleyado na pisikal o personal na pumapasok sa opisina. Ayon sa nasabing probisyon ng batas, dapat tiyakin ng mga employers na ang kanilang telecommuting employees ay binibigyan ng parehong pagtrato tulad sa mga empleyado na nagtatrabaho sa oras at lugar mismo ng employer. Sakop dito ang ilan sa mga sumusunod na karapatan: a.) May karapatan sa mga panahon ng pahinga, regular na pista opisyal, at mga espesyal na araw na walang trabaho; b.) Magkaroon ng pareho o katumbas na workload at mga pamantayan sa pagganap tulad ng mga katulad na manggagawa na pisikal na nasa opisina; at c.) Magkaroon ng parehong access sa pagsasanay at mga pagkakataon sa pagpapaunlad ng karera tulad ng sa mga maihahambing na manggagawa sa lugar ng employer, at napapailalim sa parehong mga patakaran sa pagtatasa na sumasaklaw sa mga manggagawang ito.

Karagdagan dito, dapat din matiyak ng mga employer na hindi magkaroon ng isolation ang mga telecommuting employees sa komunidad ng nagtatrabaho sa loob ng opisina sa pamamagitan ng pagbibigay sa kanila ng pagkakataon na makipagkita sa mga kasamahan sa regular na batayan, at pagbibigay-daan sa pag-access sa impormasyon ng kumpanya.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.