Parusa sa paglabag sa spearfishing sa scuba divers

ni Atty. Persida Rueda-Acosta @Magtanong Kay Attorney | June 7, 2025

Dear Chief Acosta,

Mahilig akong mag-scuba diving at nahuhumaling ako sa ganda ng ating mga karagatan. Palagi kong naririnig sa mga nagtuturo sa amin na bawal umano ang spearfishing o pagpana ng isda habang nag-scuba diving. Totoo ba ito? Nais ko sanang maliwanagan. Maraming salamat po. — Keenan

---

Dear Keenan,

Ang Estado ay may tungkuling protektahan at laging itaguyod ang ating mga natural na yaman. Ang pangangalaga at pag-iingat sa ating yamang tubig ay isa sa mga binibigyang pansin ng ating pamahalaan.

Ayon sa Rules and Regulations Governing the Business of Sport Scuba Diving in the Philippines, na ipinatupad ng Department of Tourism (DOT) noong ika-28 ng Enero taong 2009 sa bisa ng Letter of Instructions No. 745 at Office of the President Memorandum Order No. 275, s. 2008, ang lahat ng mga nasa negosyo ng scuba diving bilang isang sport ay dapat sumunod sa mga alituntuning itinakda ng pamahalaan. Kabilang dito ang pagbabawal ng spearfishing o pagpana ng isda habang nag-scuba diving. Nasasaad sa Kapitolo IV, Seksyon 1 ng nasabing alituntunin na:

“Chapter IV - Prohibited Acts

Section 1. Dive establishments and dive professionals shall prohibit the following acts:

a. Collection or destruction of corals;

b. Capture of or harm to endangered marine species;

c. Use of toxic chemicals in the course of diving;

d. Spearfishing using scuba;

e. Salvage of or transferring with any sunken artifacts without the necessary permit from proper authorities.”

Malinaw sa nasabing alituntunin na isa sa mga ipinagbabawal na aktibidad habang nag-scuba diving ay ang paghuli ng isda sa pamamagitan ng pana. Kabilang din sa mga ipinagbabawal ay ang pagkuha o pagsira ng mga corals, paghuli o paglagay sa panganib sa mga nanganganib na uri ng yamang-dagat, paggamit ng mga nakalalasong kemikal habang sumisisid, at pagkuha o paglipat ng anumang lumubog na artifact nang walang kinakailangang pahintulot mula sa kaukulang awtoridad.

Upang sagutin ang iyong katanungan, may katotohanan ang pagbabawal ng paghuli ng isda gamit ang pana habang nag-scuba diving. Maaaring maharap sa kaukulang parusa, multa, suspension o kanselasyon ng lisensya ng mga dive establishments o dive professionals ang mga hindi susunod sa nabanggit na alituntunin. Ayon sa Kapitolo 5, Seksyon 1(b) ng kaparehong alituntunin:

“Imposition of Fine, Suspension, Cancellation and/or Non-Renewal of License

Section 1. Grounds for the Imposition of Fine, Suspension, Cancellation and/or Non-renewal of License – Any of the following acts of omissions shall be sufficient grounds for the imposition of fine, suspension or cancellation of the license depending on the circumstance and gravity of each given case:

x x x

b. Violation of any of the provision of the Rules, circulars and orders of the Commission; x x x”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Certificate of Plant Variety Protection ng mga breeder

ni Atty. Persida Rueda-Acosta @Magtanong Kay Attorney | June 6, 2025

Dear Chief Acosta,

Mahilig ako sa mga halaman. Sa aking pag-aaral, napag-alaman ko na maaari palang mabigyan ng proteksyon ang mga taong makakapagdiskubre ng bagong plant variety sa pamamagitan ng pagkakaroon ng Certificate of Plant Variety Protection. Ganoon pa man, may mga pagkakataon ba na maaaring makansela ang nasabing sertipiko? Maraming salamat sa inyo. — Tita Pat

---

Dear Tita Pat,

Matatagpuan ang kasagutan sa iyong katanungan sa Seksyon 62 ng Republic Act (R.A.) No. 9168, o “Philippine Plant Variety Protection Act of 2002”, kung saan nakasaad na:

“Section 62. Grounds for Cancellation. - The Plant Variety Protection shall be cancelled on any of the following grounds:

a) The breeder does not provide the required information, documents, or materials necessary for verifying the maintenance of the variety; or

b) the breeder fails to pay the required fees to keep his or her rights in force or provides false information in his or her application; or

c) The breeder does not propose, within the time/period provided under the regulations, another suitable denomination if the denomination of the variety is cancelled after the grant of the Certificate of Plant Variety Protection; or

d) The conditions of uniformity and stability could not be maintained although these were present at the time of the issuance of the Certificate of Plant Variety Protection; or

e) The breeder entitled to the Certificate of Plant Variety Protection or the holder has relinquished his/her rights through a declaration in a public instrument filed with the registrar.”

Nakalahad sa nabanggit na batas ang mga batayan upang kanselahin ang tinatawag na Certificate of Plant Variety Protection, at ang mga sumusunod ay ilan sa mga ito: 1.) nabigo ang breeder na magbayad ng mga kinakailangang bayarin upang mapanatiling may bisa ang kanyang mga karapatan o nagbigay ng maling impormasyon sa kanyang aplikasyon; o 2.) Ang mga kondisyon ng pagkakapareho at katatagan ay hindi mapanatili kahit na ang mga ito ay naroroon sa oras ng pagpapalabas ng nasabing sertipiko; o 3.) ang breeder na may pinanghahawakan na Certificate of Plant Variety Protection ay binitiwan ang kanyang mga karapatan sa pamamagitan ng isang deklarasyon sa isang pampublikong instrumento na inihain sa registrar. Ang mga nabanggit ang ilan sa nasabing mga batayan upang makansela ang naibigay na Certificate of Plant Variety Protection.

Para sa kaalaman ng mas nakararami, pinapayagan ang mga breeder ng halaman na irehistro ang nalikha o natuklasan na bagong plant variety kung ito ay bago, naiiba, magkakapareho (uniform), at matatag alinsunod sa Section 4 ng batas. Sang-ayon naman sa Section 36 ng batas, ang taong mabibigyan ng Certificate of Plant Variety Protection ay makakaroon ng karapatan na magpahintulot ng pagpaparami, pagbebenta, pag-angkat, pagluwas at iba pang karapatan ukol sa bagong plant variety na kanyang ginawa o natuklasan. 

Karagdagan dito, nais naming ipaalam sa iyo na ang anumang Petition to Cancel a Certificate of Plant Variety Protection ay nasa ilalim ng orihinal na hurisdiksyon ng National Plant Variety Protection Board at maaaring maiapela sa Court of Appeals sa loob ng 15 araw magmula sa araw na pagkakaalam ng pinal na desisyon ng National Plant Variety Protection Board. Ito ang nakasaad sa Seksyon 63 ng R.A. No. 9168, na:

“Section 63. Venue. - Any petition to cancel a Certificate of Plant Variety Protection shall originally be under the jurisdiction of the Board. Decisions of the Board may be appealable with the Court of Appeals within fifteen (15) days from the date of notice of the Board’s final decision.”

Ang nasabing batas ay ipinatutupad nang naaayon sa polisiya ng ating pamahalaan na pagkilala sa isang epektibong sistema ng intelektuwal na ari-arian sa pangkalahatan at ang pagbuo ng bagong uri ng halaman na mahalaga sa pagtatamo ng seguridad sa pagkain para sa bansa. Kung kaya, kinakailangan na protektahan at siguruhin ang mga eksklusibong karapatan ng mga breeder kaugnay ng kanilang bagong uri ng halaman lalo na kung kapaki-pakinabang sa mga tao para sa mga panahong itinatadhana sa nasabing batas. 

Kung kaya, bilang kasagutan sa iyong katanungan, matatagpuan sa partikular na probisyon ng nabanggit na batas ang mga nasabing batayan na maaaring maging dahilan upang makansela ang naibigay na Certificate of Plant Variety Protection sa isang breeder. Ito ay angkop sa nasabing polisiya at upang masigurado na maproteksyunan ang karapatan ng mga kuwalipikadong tao na mapanatili ang kanilang sertipiko.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

‘Option contract’ na walang wastong kabayaran

ni Atty. Persida Rueda-Acosta @Magtanong Kay Attorney | June 5, 2025

Dear Chief Acosta,

May katanungan ako tungkol sa ginawa ng kumpare ko sa naging usapan namin. Noong ika-15 ng Marso 2025, inalok niya sa akin na bilhin ko ang kanyang bahay at lupa. Dahil wala pa akong nakahandang pera para ipambayad sa nasabing ari-arian, nagkasundo kami na bibigyan niya ako ng isang linggo para pag-isipan ito. Subalit, makalipas ang dalawang araw matapos ang aming usapan, binawi ni kumpare ang aming kasunduan at ibinenta niya ang nasabing ari-arian sa iba. Maaari ba akong maningil ng danyos sa pagbawi ng aking kumpare sa aming kasunduan? Maraming salamat sa inyong kasagutan. — Andres

---

Dear Andres,

Sa Artikulo 1324 ng New Civil Code ng ating bansa, partikular na nakasaad na:

“Article 1324. When the offerer has allowed the offeree a certain period to accept, the offer may be withdrawn at any time before acceptance by communicating such withdrawal, except when the option is founded upon a consideration, as something paid or promised.”

Kaugnay nito, sa kasong Spouses Vazquez vs. Ayala Corp., (G.R. No. 149734, 19 November 2004), isinulat ni Kagalang-galang na Kasamang Mahistrado Dante O. Tiñga, binigyan ng kahulugan ang terminong “option contract”:

“An option is a preparatory contract in which one party grants to another, for a fixed period and at a determined price, the privilege to buy or sell, or to decide whether or not to enter into a principal contract. It binds the party who has given the option not to enter into the principal contract with any other person during the period designated, and within that period, to enter into such contract with the one to whom the option was granted, if the latter should decide to use the option. It is a separate and distinct contract from that which the parties may enter into upon the consummation of the option. It must be supported by consideration.”

Ibig sabihin, ang susi sa pagiging legal ng isang option contract ay ang tinatawag na “consideration” o wastong halaga bilang kapalit ng karapatang magdesisyon sa loob ng napagkasunduang panahon. Kung walang ibinayad na consideration, maaaring bawiin ng nagbebenta ang kanyang alok kahit nasa loob pa ito ng napagkasunduang panahon.

Ang option contract ay hindi pa bentahan, kundi isang kasunduan para magbigay ng pagkakataon sa isang partido na magdesisyong bumili.

Kaya naman sa iyong sitwasyon, hindi ka maaaring maningil ng anumang danyos sa iyong kumpare sa pagbawi niya sa inyong kasunduan bago matapos ang isang linggo. Ito ay sa kadahilanang wala kang ibinigay na consideration o wastong halaga bilang kapalit ng karapatang magdesisyon sa loob ng napagkasunduang panahon. Dahil dito, may karapatan siyang bawiin ang kanyang alok sa iyo kahit hindi pa tapos ang inyong napagkasunduang panahon.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.