Selebrasyon ng Pista ng Itim na Nazareno, stop kung pasaway ang mga deboto

ni Leonida Bonifacio Sison - @Boses | January 7, 2021

Ipasasara ang simbahan ng Quiapo at ipatitigil ang lahat ng aktibidad na may kaugnayan sa Pista ng Itim na Nazareno.

Ito ang babala ng Quiapo Church spokesperson kung may mga deboto na manggugulo sa okasyon at lalabag sa mga ipinatutupad na safety protocols sa Enero 9. Aniya, ito ay para matiyak ang kaligtasan ng lahat dahil mayroon pa ring COVID-19, hindi lang sa ‘Pinas kundi maging sa buong mundo.

Matatandang, kinansela ng simbahan ang tradisyunal na Traslacion na dinadagsa ng milyun-milyong deboto, kaya ngayong taon, 15 misa ang isasagawa sa Enero 9 kung saan mananatiling limitado ang kapasidad ng simbahan kada misa.

Gayundin, maglalagay ng LED screen sa labas ng simbahan upang makita rin ng mga deboto na nasa labas ang misa, ngunit kailangang magpatupad din ng isang metrong physical distancing.

Bagama’t kakaiba ang pagdiriwang ng Pista ng Itim na Nazareno ngayong taon, gawin pa rin natin itong makabuluhan.

Maaga pa lang, hindi na nagkulang sa paalala ang mga awtoridad, kaya panawagan sa mga deboto, tiyaking susunod tayo sa mga umiiral na health protocols at kung magpapasaway lang kayo, manahimik na lang kayo sa bahay.

‘Wag ninyong sayangin ang pagsisikap ng simbahan na maitaguyod ang okasyong ito dahil lang sa pagpapasaway n’yo.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga opisyal na walang kadala-dala na todo-party kahit bawal, sampolan!

ni Leonida Bonifacio Sison - @Boses | January 6, 2021

Matatandaang ipinagbawal ang Christmas party o anumang pagtitipon sa anumang opisina ng gobyerno, nasyonal man o lokal bilang hakbang upang maiwasan ang hawaan noong holiday season.

Bagama’t mayorya ng mga lokal na pamahalaan ay tumalima sa kautusang ito, mayroon pa rin talagang pasaway at hindi maawat.

Dahil dito, kinastigo ng Department of the Interior and Local Government (DILG) ang alkalde ng Laoag City dahil sa Christmas gathering na sinasabing inorganisa nito sa Ilocos Norte.

Ayon kay Usec. Jonathan Malaya, Interior Spokesperson, ipinag-utos na ni Sec. Eduardo Año ang pag-iisyu ng “show cause order” (SCO) laban sa alkalde dahil sa umano’y paglabag sa kautusang nagbabawal sa mass gathering noong holiday season.

Dagdag pa ng opisyal, nakatanggap sila ng ulat na isang Christmas party ang inorganisa ng alkalde kasama ang iba pang government at barangay officials, kaya agad inatasan ni Año ang alkalde na magpaliwanag.

Nakakadismaya talaga dahil parang walang kadala-dala ang ilang opisyal. Sinabi na ngang bawal ang party, hayan at sila pa itong pasimuno.

At kapag may nangyaring hawaan, sino ang tatawaging pasaway, ang taumbayan?

Tungkulin ninyong matiyak na walang pasaway sa inyong nasasakupan, pero kayo itong nangunguna. Kaya kung may ganitong klase ng lider, ano nang mangyayari?

Bilang lider, kayo ang dapat maging ehemplo sa inyong mamamayan. ‘Wag ‘yung kayo pa itong sakit ng ulo at ang ending, lalong nagpapasaway ang taumbayan.

Panawagan din natin sa mga kinauukulan, sampolan ang sinumang opisyal na lumabag. Patunayan n’yong napaparusahan ang dapat parusahan, anuman ang kanilang katayuan sa buhay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagkapit sa patalim ng mga kabataan para makapag-aral, imbestigahan at tulungan ng gobyerno!

ni Leonida Bonifacio Sison - @Boses | January 5, 2021

Kasabay ng pagbaba ng bilang ng mga mag-aaral na lumalahok sa distance learning, hinihikayat ni Sen. Sherwin Gatchalian ang Department of Justice (DOJ) at Philippine National Police (PNP) na paigtingin ang kanilang imbestigasyon laban sa mga estudyanteng diumano’y nagbebenta ng malalaswang litrato at video.

Inihalimbawa ng mambabatas ang isang artikulo sa Philippine Online Student Tambayan (POST), isang news portal para sa mga estudyante, kung saan naiulat na may ilang mag-aaral na nagsagawa ng “Christmas sale” ng kanilang malalaswang litrato at video para makabili ng gadget at makapagbayad ng internet para sa kanilang distance learning.

Gumamit pa umano ng hashtag ang mga ito na #AlterPH, #AlterPinay at #AlterPhilippines sa pagbebenta ng nasabing mga larawan sa Twitter kung saan ang ilang malalaswang materyal ay ibinebenta sa halagang P150. At minsan, pinagsasamantalahan ng masasamang-loob ang pangangailangan ng mga mag-aaral at dapat umano itong labanan ng pamahalaan.

Dahil dito, inatasan na ng mambabatas ang Department of Education (DepEd) na palakasin ang kanilang child protection program, kung saan ang child protection committees (CPC) sa mga paaralan ay inatasan ding kilalanin ang mga mag-aaral na nakararanas ng abuso o exploitation online.

Sa totoo lang, nakakalungkot dahil kailangang umabot ng ilang kabataan sa ganitong punto para lang maitaguyod ang kanilang pag-aaral.

Kaya ang tanong, sino ba ang kalaban natin dito, ang mga estudyante o kahirapan?

Hindi natin sinasabing tama ang ganitong gawain, ngunit kung tutuusin, gumagawa lang sila ng paraan para maitawid ang kanilang pag-aaral sa gitna ng pandemya. Kaya sana, alamin natin kung paano tayo makatutulong sa kanila at paano maiiwasan ang ganitong sitwasyon.

Kumbaga, alamin natin ang tunay na problema at saka solusyunan sa tamang paraan nang sa gayun ay walang mag-aaral na kakapit sa patalim para lang makapag-aral.

At tayong mga magulang, bantayan ang online activities ng mga bata, lalo na kung ito ay maaaring maging sanhi ng anumang klase ng pang-aabuso.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com