Taumbayan, may “K” maging choosy sa bakuna vs. COVID-19!

ni Leonida Bonifacio Sison - @Boses | January 13, 2021

Hindi maaaring mamili ng brand ng libreng bakuna ang mga magpapaturok, ayon kay Presidential Spokesperson Harry Roque.

Bagama’t may karapatan umano ang lahat na magkaroon ng mabuting kalusugan, hindi maaaring maging pihikan sa mga babakunahan dahil maraming Pilipino ang dapat maturukan.

Bukod pa rito, sinabi pa ng opisyal na hindi maaaring mamili dahil hindi naman pipilitin ang mga ayaw magpabakuna, pero kailangan aniyang lumagda sa isang waiver ang ayaw magpaturok, lalo na kung kasama ito sa listahan ng mga prayoridad na tuturukan.

Agad na nag-react ang taumbayan at as usual, umani ng iba’t ibang reaksiyon ang pahayag na ito ng opisyal kung saan may ilang pumalag at may mangilan-ngilan namang sumang-ayon.

Gayundin, taliwas sa pahayag ng tagapagsalita ang tugon ng isang mambabatas.

Giit ng mambabatas, hindi patas ang ganitong opinyon dahil dapat bigyan ng opsyon ang taumbayan kung anong brand ng COVID-19 vaccine ang kanilang nais ipaturok.

Matatandaang sinabi ng Department of Health (DOH) ang pagkuha ng Pilipinas ng 25 million doses ng COVID-19 vaccines mula sa Chinese firm na Sinovac.

Ang naturang bakuna ng Sinovac ay hindi pa nakakukuha ng emergency use authorization mula sa United States at Europe, kumpara sa ibang bakuna na mas mura ang halaga.

Hirit naman ng DOH, malaya ang mga Pinoy na pumili kung ano’ng brand ng COVID-19 vaccine ang nais nila, basta ito ay ligtas at epektibo.

Kung tutuusin, karapatan naman ng taumbayan na mamili ng kanilang ipatuturok dahil una sa lahat, katawan at buhay nila ito. Isa pa, pera naman ng taumbayan ang gagastusin para rito, kaya bakit bawal maging choosy?

Pakiusap sa mga kinauukulan, bigyan natin ng kalayaan ang taumbayan, lalo na sa pagpili ng bakuna dahil dito nakasalalay ang kanilang kaligtasan kontra sa virus.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Posibleng COVID-19 surge dahil sa holiday season, hindi nakapagtataka

ni Leonida Bonifacio Sison - @Boses | January 12, 2021

Matapos ang holiday season, sinabi ng Department of Health (DOH) na makikita na ang epekto nito ngayong linggo habang patuloy na binabantayan ang bansa hinggil sa pagpasok ng bagong COVID-19 variants.

Matatandaang, noong Disyembre, naiulat ng OCTA Research group ang COVID-19 surge sa Metro Manila dahil sa ilang aktibidad noong holiday season tulad ng pag-uwi ng ilan nating kababayan sa kanilang mga probinsiya.

Ngunit bukod pa rito, naglabas ng paalala ang ahensiya sa mga deboto ng Itim na Nazareno na nagtungong simbahan, na i-monitor ang kanilang mga sarili at kung sakaling makaramdam ng sintomas, agad na magpakonsulta sa doktor at mag-isolate.

Kung sakaling tumaas man ang COVID-19 cases, hindi ito nakapagtataka dahil noong kasagsagan ng Kapaskuhan, hindi maitatangging napakaraming lumabag sa health protocols.

Tipong kahit paulit-ulit na ipinaalalang sumunod sa minimum health standards, wa’ epek dahil talagang dinagsa ang mga pamilihan, gayundin ang mga pasyalan.

Pagdating naman ng pagsalubong sa Bagong Taon, ‘di rin naiwasan ang ilang pagtitipun-tipon ng mga magkakapamilya.

Kung tutuusin, ‘di rin naman maiiwasan dahil marami ang nasabik makasama ang kanilang mga mahal sa buhay.

Bagama’t wala namang may gustong tumaas ulit ang COVID-19 cases sa bansa, sana’y magsilbi itong paalala sa lahat na patuloy tayong sumunod sa ipinatutupad na health protocols.

Tandaan na anumang oras ay puwede tayong mahawa ng virus, kaya utang na loob, doblehin ang pag-iingat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga selebrasyon sa ‘Pinas, pag-aralan kung oks ipagdiwang online

ni Leonida Bonifacio Sison - @Boses | January 11, 2021

Iba’t iba ang naging reaksiyon ng publiko hinggil sa Traslacion 2021.

Maraming deboto ang natuwa dahil kahit walang prusisyon at iba pang tradisyon, nakagawa ng paraan ang simbahan para maitaguyod ang Pista ng Itim na Nazareno. Habang marami rin ang nadismaya dahil sa pagdagsa ng mga deboto na nauwi sa siksikan.

Dahil dito, umani ng batikos mula sa social media ang okasyon dahil ipinagpatuloy ito, kaya giit ng ilang netizens, masasabing mass gathering ang nangyari at dapat ay naging online na lang muna ang selebrasyon.

Gayunman, iginiit ng Manila Police District (MPD) at lokal na pamahalaan ng Lungsod ng Maynila na naging matagumpay ang selebrasyon ng Traslacion 2021.

Sa huling misa ng Traslacion, sinabi ng rector ng Quiapo Church na si Msgr. Hernando Coronel na hindi talaga maiiwasan ang mga tao na pumunta mismo sa simbahan sa kabila ng pakiusap na ‘wag nang pumunta at makinig na lang sa online mass.

Dagdag pa ng opisyal, marami silang hakbang para masiguro ang kaligtasan ng mga tao, kaya naisipan nilang misa lang ang gagawin at wala nang iba, ngunit nagulat umano siya sa pagdagsa ng maraming deboto.

Samantala, nagpaalala ang DOH sa lahat ng mga pumunta sa Traslacion na obserbahan ang sarili kung magkakaroon ng mga sintomas gaya ng lagnat, ubo, sipon, pagkawala ng panlasa at pang-amoy.

Siguro nga, ‘di talaga maiiwasan ang pagdagsa ng mga tao sa ganitong klase ng okasyon dahil parte na ito ng kanilang buhay, lalo pa ngayong maraming dapat ipagdasal gayung nahaharap sa problema ang ilan sa ating mga kababayan.

Ngunit ‘ika nga, tapos na ang selebrasyon at wala na tayong magagawa. Pero sana, magsilbing aral ito na sa susunod pang mga okasyon, pag-isipang mabuti kung puwede itong ipagdiwang online o ‘wag na lang muna.

Baka kasi sa halip na alternatibong paraan ito para makapagdiwang, eh maging mitsa pa ng panibagong hawaan. Ibig sabihin, bagong problema, hindi lang sa mga mahahawa kundi maging sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com