Sa gitna ng pandemic, French Tennis Open papalo pa rin

ni Eddie M. Paez Jr. - @Sports | July 7, 2020

Matapos na atakihin ng COVID-19 ang mga atleta kabilang na si Novak Djokovic sa isang charity event, tuloy ang panunumbalik ng professional tennis sa panahon ng pandemya.

Ayon sa French Tennis Federation, bubuksan na ang mga ticket offices para sa French Open na inaasahang dadaluhan ng may 20,000 manonood. Ang bilang na ito, na tatampukan ng mga bakbakan sa sa mga main courts ng Philippe-Chatrier, Suzanne-Lenglen at Simonne-Mathieu, ay tinatayang nasa 50% hanggang 60% lang ng kapasidad sa palaruan.

Sa Setyembre nakatakdang magsimula ang grandslam event na French Open. Nauna rito, kanselado na ang pagdaraos ng isa pang grandslam tourney (Wimbledon).

Matatandaang si Djokovic, ang world no. 1 tennis player, kasama sina Borna Coric, Grigor Dimitrov at Viktor Troicki, ay naglaro sa isang exhibition tennis series at lahat sila ay naging positibo sa coronavirus. Ang maybahay ni Djokovic na si Selena, pati na ang kanyang coach (Goran Ivanisevic) ay kinapitan din ng nakamamatay na virus.

Binibigyan ng unang pagkakataon ang mga kasapi na makabili ng mga tiket para sa French Open at ito ay uumpisahan sa Hulyo 9 samantalang ang pagbili ng tiket para sa publiko ay magsisimula pagkalipas ng isang linggo.

Hindi pauupuan ang mga piling espasyo bilang bahagi ng social distancing protocol. Ang mga magkakasama namang manonood ng laro ay papayagang umupo na magkakatabi pero ang mga indibidwal na magkakatabi ay hindi dapat lumagpas ng apat. Ang paggala sa loob ng venue ay pinapayagan basta't mayroong face mask ang mga manonood subalit hindi ito kailangang isuot kung nakaupo na at nanonood ng laro.

Poporma na ang 'Pinas sa FIDE Online Olympiad

ni Eddie M. Paez Jr. - @Sports | July 6, 2020

Nawala sa eksena ang prestihiyosong "face-to-face" na World Chess Olympiad na nakatakda sanang ganapin sa Russia dahil sa pag-atake ng coronavirus sa buong mundo pero hindi nagpakaldag ang world governing body ng ahedres sa pamamagitan ng pagsasaayos ng FIDE Online Olympiad 2020 simula Hulyo 22 hanggang Agosto 30.

Inaasahang daragsain ang paligsahan ng mga "chess-playing nations" kabilang na ang mga pandaigdigang puwersa mula sa China, America at Europa. Pumoporma na rin ang Pilipinas sa pagbuo ng team at marami ang umaasang hindi mapapatid ang "winning streak" ng bansa sa international online chess. Kamakailan ay itinanghal na world champion si FIDE Master Sander Severino sa IPCA tournament..

Nagsimula na ang pagpapatala para sa Online Olympiad ng FIDE. Anim na kasapi ang kinakailangan sa bawat koponan. Sa anim, dalawa ay dapat na women chesser at dalawa ang junior woodpushers (isang binatilyo at isang dalagita na kapwa ipinanganak noong taong 2000 pataas). Pinapayagang magkaroon ng anim na reserve chessers at isang team captain.

Sa Hulyo 13 ang huling araw ng pagpapatala habang sa Hulyo 16 naman ang pagbubunyag ng Continental Nominations.

Paiiralin ang 15 minuto - 5 segundo kada galaw na time control sa bakbakan. Mayroong dalawang bahagi ang Online Olympiad bukod pa sa play-off stages. Ang seedings ay nakabase sa resulta ng huling Gaprindashvili Cup at ng Batumi Chess Olympiad noong 2018.

Hindi pa nadedetermina ang internet chess platform na gagamitin sa paligsahan.

Samantala, sa salpukan ng mga elite na apisyunado ng ahedres, itinanghal na hari ng Online Chessable Masters si World Champion at Norwegian Grandmaster Magnus Carlsen matapos daigin si Dutch GM Anish Giri.

Pasaway na ex-marathon record holder, huli sa pamemeke ng ebidensiya

ni Eddie M. Paez Jr. - @Sports | July 5, 2020

Ilang buwan na ang nakakaraan nang inaresto si dating Kenyan Wilson Kipsang matapos itong lumabag sa curfew na pinapairal sa bansa upang mapigilan ang paglaganap ng coronavirus o COVID-19.

Pero dahil sa pagiging pasaway, apat na taong ban naman ang ipinataw sa kanya ng Athletics Integrity Unit matapos na makumpirmang pineke niya ang nga ebidensyang isinumite hinggil sa pagdinig naman sa kanyang kaso sa paggamit sa mga ipinagbabawal na substance.

Base sa AIU, mayroong nairehistro ng apat na whereabouts violation si Kipsang. Hindi rin nito naisumite ang sarili para sa mga substance tests. Isa sa kanyang palusot ay ang kinasangkutan diumanong aksidente sa kalye. Nagbigay siya ng larawan ng aksidente na kalaunan ay nadiskubreng nangyari tatlong buwan pagkatapos ng nakatakda sanang test niya noong Mayo 17.

Matatandaang nang mahuli ito tungkol sa curfew, lahat ay pinagbabawalang lumabas sa kani-kanyang bahay simula ikapito ng gabi sa Kenya pero ang mga awtoridad ay inalertohan tungkol sa isang grupo na nagtatago sa isang club sa Iten. Nang puntahan ng pulis ang lugar, inaresto ang grupong kinabibilangan ni Kipsang.

"These are high profile individuals who should be helping us in enforcement of the curfew. We are asking members of the public to stop abusing our reluctance to use full force during the enforcement of the curfew." pahayag noon ng pulisya.

Nagmarka si Kipsang sa pagrerehistro ng dating world standard sa marathon na dalawang oras, tatlong minuto at 23 segundo sa Berlin Marathon noong 2013. Kasama rin sa kanyang impresibong rekord ay ang bronze medal sa 42.195 kilometrong event ng London Olympics (2012), dalawang titulo sa London Marathon (2012 at 2014), isang korona ng New York City Marathon (2014) at minsang pamamayagpag sa Tokyo Marathon (2017).