Champion’s Chess Tour: So, sinilat si Speedchess Monster Nakamura

ni Eddie M. Paez Jr. - @Sports | November 30, 2020

Tuloy ang pagsulong sa trono ni Pinoy Grandmaster Wesley So matapos silatin si GM Hikaru “Speedchess Monster” Nakamura sa semifinals ng online na bakbakan sa paspasang ahedres na tinaguriang Champions Chess Tour: Skilling Open.

Pagkatapos ng dalawang 4-game series, nangibabaw ang 27-taong-gulang na chesser karga ang 4.5-3.5 na iskor mula sa isang panalo at pitong tabla. Halos ganito rin ang naging resulta sa kabilang hati ng semifinals nang nagliwanag ang husay ni GM Magnus Carlsen laban kay Russian GM Ian Nepomniachtchi.

Maghaharap sina So at ang world champion mula sa Norway na si Carlsen sa finals ng patimpalak na nilalahukan lang ng 16 na pili at malulupit na mga chessers mula sa iba’t-ibang parte ng daigdig para makaparte sa cash pot na $100,000.

Bukod sa pagbibigay ng sama ng loob kay Nakamura, maigting ang naging landas ng tubong Cavite na chesser papunta sa championship round.

Pumangatlo si So noong preliminaries tangay ang 8.5 puntos para makahakbang sa knockout stage kung saan unang humarang sa kanyang daanan si GM Teimour Radjabov ng Azerbaijan. Nameligro si So pagkatapos makatikim ng 1.5-2.5 na kahihiyan sa unang salpukan nila ni Radjabov. Naitabla niya ang sumunod na mini-series nila kaya nauwi sa rubber match na armagedon ang duwelo. Sa huli, naipagpag ni So ang karibal para makapasok sa round-of-4.

Puntirya ni So ang kanyang pangatlong korona ngayong 2020. Kamakailan, naitakbo niya ang kanyang pangalawang titulo sa prestihiyosong US Chess Championship (una siyang naging US Champion noong 2017). Noong 2020 Saint Louis Rapid and Blitz Tournament naman, isang bakbakan sa larangan ng rapid chess at blitz chess, idineklara sila ni Carlsen bilang co-champions matapos silang makaipon ng 24 puntos.

FIDE PWD Online Chess: Phl, dinaig ang topseed Poland

ni Eddie M. Paez Jr. - @Sports | November 27, 2020

Sinilat ng Pilipinas ang pre-tournament favorite Poland sa panglimang yugto, 3-1, upang mapanatili ang puwesto ng tatlong kulay ng bansa sa top 8 ng ginaganap na FIDE Online Chess Olympiad For People With Disabilities.

Puro chess masters (isang Grandmaster, dalawang FIDE Masters at isang WCM) ang pinakawalan ng unang koponan ng Poland nang sagupain nito ang Pilipinas pero hindi nakaldag ang mga kinatawan nang huli.

Hinatak ni IPCA (International Physically Disabled Chess Asdociation) World champion at FIDE Master Sander Severino (rating: 2364) si GM Marvin Tazbir (rating: 2513) sa hatian ng puntos sa bakbakang board 1. Ganito rin kagiting ang naiposteng resulta sa board 3 ni untitled Jasper Rom (rating: 2202) laban kay FM Lukasz Nowak (rating: 2265).

Bukod dito, naitakbo nina untitled entries Darry Bernardo (vs. FM Marcin Molenda) at Cheyzer Crystal Mendoza (vs. WCM Anna Stolarczyk) ang buong puntos kontra sa magkaibang mga karibal sa board 2 at 4 ayon sa pagkakasunod-sunod upang selyuhan ang upset sa malupit na kompetisyon.

Bukod sa panalo laban sa Poland 1, kasama na sa kartada ng mga bata ni Team Captain James Infiesto pagkatapos ng limang rounds ang tabla sa Canada at sa Israel pati na ang makinang na mga panalo laban sa U.S. (4-0) at sa Russia 2 (3-1).

Ang Team Philippines 2 naman nina Menandro Redor, Arman Subaste, Felix Agilera at Cheryl Angot ay nakakapit sa pang-15 na puwesto pagkatapos na ibagsak ang Colombia 2 sa iskor na 3.5-0.5.

Nasa homestretch na ang dalawang linggong kompetisyong nahahati sa dalawang yugto. Ang unang bahagi ng bakbakan ay isang pitong round na Swiss System. Ang unang apat na teams ay sasalang sa double round semis kung saan ang top 2 ay magsasalpukan para sa kampeonato. Sagupaan para sa huling upuan ang magaganap sa dalawang koponan na hindi makakapasok sa finals. Pinapairal ang 25/10 time control sa torneo.

GM So, dinurog ang Polish GM, para sa semis ng Speed Chess

ni Eddie M. Paez Jr. - @Sports | November 23, 2020

Dinurog ni Pinoy Grandmaster Wesley So si GM Jan Krzysztof Duda ng Poland, 16.0-10.0, sa kanilang round-of-8 na duwelo upang matagumpay na makapasok sa semifinals ng 2020 Elite Speed Chess Championships na ginaganap pa rin online bilang pananggalang ng mga organizers sa pandemya.

Nahati sa tatlong bahagi ang naging girian nina So at Duda base sa time control: 5/1, 3/1 at 1/1. Ang una at pangatlong bahagi ay gitgitan dahil nauwi sa 4-4 na standoff ang 5/1 at 4-5 naman sa 1/1 pabor sa Polish na dumaig kay world no. 2 at Italian American GM Fabiano Caruana sa quarterfinals. Pero nagmistulang maestro ni Duda sa 3/1 segment ang tubong Cavite na disipulo ng ahedres dahil sa pagkolekta ni So ng 7 panalo at dalawang tabla para sa iskor na 8.0-1.0.

Haharapin ni So, 27-taong-gulang na bumiktima kay dating child wonder GM Nordibek Abdusattorov ng Uzbekistan (18.0-10.0) noong round-of-16, ang mangingibabaw sa salpukan nina 2019 champion GM Hikaru Nakamura ng USA at Russian GM Vladimir Fedoseev.

Dalawang beses nang naging runner-up sa torneo ang dating hari ng ahedres sa Pilipinas (2018 at 2019). Sa nakaraang dalawang taon din, si GM Hikaru Nakamura ang nagkampeon. Kasali ngayong 2020 para ipagtanggol ang kanyang titulo si Nakamura gayundin si GM Magnus Carlsen, ang kasalukuyang world chess king, na gustong maulit ang kanyang tagumpay noong 2017. Sina Nakamura at Carlsen ang umuokupa ng unang dalawang puwesto sa seedings.

Bagong patong sa ulo ni So ang korona ng prestihiyosong US Chess Championship. Kamakailan din, sa 2020 Saint Louis Rapid and Blitz Tournament, isang bakbakan sa larangan ng rapid chess at blitz chess, idineklara sila ni Norwegian GM Magnus Carlsen bilang co-champions matapos silang makaipon ng 24 puntos.