Pag-asa ng ahedres na kay "Puso"

ni Eddie M. Paez Jr. - @Sports | December 28, 2020

Umuwing walang laman ang kaban ng medalya ng Pilipinas mula sa World FIDE World Online Youth and Cadet Rapid Chess Championships dahil hindi nakapasok sa podium sina April Joy Claros at Michael Concio. Ang pangatlo sanang kinatawan ng bansa ay hindi pinayagang maglaro ng mga punong-abala.

Ngunit isang tanong na sumulpot ay kung sakaling hindi naitsapwera ng FIDE si Whisley King Puso, isang prize find mula sa Sta. Rosa, Laguna, posible kayang naka-podium ang batang pambato ng bansa sa pandaigdigang palaruan?

Matatandaang pinagbawalan ng FIDE ang pambato ng Pilipinas sa Open U12 na lumahok sa world finals bilang pangunahing kinatawan ng Asya matapos paratangan ng hindi patas na paglalaro. Hindi naman nagpakita ng katibayan ang world chess body pero ayon sa tuntunin ay bawal ang apela at hindi na puwedeng baguhin ang desisyon ng FIDE. Marami ang umalma pero walang nabago sa mga pangyayari.

Sa ngayon, dahil tapos na ang lahat, hindi na masasagot ang tanong. Ngunit umaasa ang karamihan ng mga tagasunod ng ahedres sa bansa na sa hinaharap ay mapapatunayang walang panlalamang na naganap. Ito ay mangyayari lang sa pamamagitan ng patuloy na pagkinang ni Puso sa iba’t-ibang paligsahan.

Hindi naman ito imposible dahil sa potensyal ng bata. Noong Oktubre, hinirang na kampeon si Puso sa U11 na pangkat ng National Youth Online Chess Championships. Buwan naman ng Nobyembre nang maselyuhan niya ang karapatang maging kinatawan ng Pilipinas sa FIDE Online Youth and Cadet Asian Qualifying Tournament. Samantala, sa FIDE website, si Puso ay may titulong Arena FIDE Master.

Umaasa ang komunidad na sa patuloy niyang pagpapaunlad ng kanyang buhay sa ahedres ay hindi ito masiraan ng loob kung may mga pansamantalang balakid sa loob at labas ng kompetisyon.

FIDE World Online Youth Chess: Claros, nasa top 5

ni Eddie M. Paez Jr. - @Sports | December 24, 2020

Tinapos ni April Joy Claros ng Pilipinas ang kanyang makulay na paglalakbay sa pandaigdigang palaruan ng ahedres nang makasosyo ng dalaginding sa panglimang puwesto ang tatlong iba pang kalahok sa Girls Under 14 ng pinakaunang FIDE Online World Youth and Cadet Championships.

Nakapasok sa podium sina Eline Roebers (1st, Netherlands), Woman FIDE Master Zsoka Gaal (2nd, Hungary) at Laysa Latifah (3rd, Indonesia) samantalang pumang-apat si Woman International Master Rocehlle Wu (USA).

Inilagay lang ng mga eksperto si Claros sa pangalawa sa kulelat sa mga may tsansang magwagi. Bilang 12th seed sa grupo ng 14 na mga kalahok, si Claros ay hindi inaasahang makakalusot sa unang sulungan ng knockout rounds. Tila hindi mapapahiya ang mga nagduda sa kakayanan niya dahil nang makaharap ni Claros ang paboritong si Woman Candidate Master Martyna Starosta ng Poland, tumiklop ang pambato ng bansa.

Isang draw na lang ang layo ni Starosta sa quarterfinals pero hindi ito nasaksihan dahil si Claros naman ang nagwagi sa pangalawang laro nila sa nabanggit na duwelo. Dahil dito, ginanap ang bakbakang Armagedon nina Starosta (Rating: 2094) at Claros (Rating: 1459) kung saan nagwagi ang huli kontra sa 3rd seed na Polish bet.

Si Claros ay bumangga sa husay ng Indonesian na si Latifah sa quarterfinals, 0-2, kaya hindi na ito nakapasok sa semifinals. Kasama sa panglima hanggang pangwalong puwesto ng batang Pinay si WCM Ruiyang Yan (USA), Macheld Foreest (Netherlands) at Shri Savitha (India).

Ang bituin mula sa Central Luzon ang pinakamakinang mula sa Philippine contingent. Pumangalawa siya sa Asian qualifiers na pinangunahan din ni Latifah. Si Michael Concio, sumabak sa Open Under 16 bilang top bet ng Asya, ay hindi nakaporma sa unang salpukan pa lang. Isa pang kinatawan ng bansa ay si Whisley King Puso sa Open Under 12 matapos mangibabaw sa Asian eliminations pero pinaratangan ng hindi patas na paglalaro kaya hindi pinasali sa world finals. Hindi nagpakita ng ebidensya ng pandaraya ang FIDE at nasa tuntunin din ng naturang qualifying tournament na hindi kinikilala ang anumang apila sa desisyon. Sinabi rin ng National Chess Federation of the Philippines na sumunod ang pambato ng bansa sa lahat ng tuntunin at wala namang pag-almang ginawa ang FIDE habang ginaganap ang paligsahan.

World One Pool 10x4: Carlo Biado, kampeon

ni Eddie M. Paez Jr. - @Sports | December 19, 2020

Itinanghal na kampeon si Carlo “The Black Tiger” Biado ng Pilipinas matapos itong mangibabaw sa apat na kataong finals kabilang na ang pangalawa sa pinakamalupit na cue artist sa mundo na si Joshua “The Killer” Filler ng Germany sa pinakaunang edisyon ng online na tumbukang tinawag na Predator One Pool 10x4 World One Pool 10-Ball Tournament.

Muling ipinakita ni Biado ang pormang nagbigay sa kanya ng gintong medalya sa 9-Ball event ng 2017 World Games at ng trono sa World Pool Billiards Association (WPA) 9-Ball Championships may tatlong taon na ang nakakalipas upang mamayagpag sa kakaibang torneo ng cue artists na tumutulong sa pagsawata sa pandemyang nagpabagal sa daigdig ng isports.

Umiskor si Biado sa finals ng 115 puntos kontra sa 93 puntos ni Filler, 103 puntos ni WPA no. 4 Fedor Gorst ng Russia at ang 42 ng sorpresang finalist na si Aloysius Yapp ng Singapore.

“All I can say is, Thank you everyone,” ani Biado, tumulong para maging runner-up ang bansa sa 2019 World Cup of Pool, sa isang pahayag ng pasasalamat at kagalakan. “All my hardwork really paid off. Mabuhay tayong mga Pinoy!” dagdag pa niya sa isang post sa social media.

Sa kahabaan ng paligsahan, hindi nawala ang tikas ng laro ng kampeong Pinoy. Noong unang salpukan sa knockout round, nagposte siya ng umuusok na 127 puntos, 112 puntos noong round-of-16 habang 116 puntos ang naging kartada niya nang ginanap ang semifinals.

Bukod kay Biado, nagningning din si Jayson Nuguid, isang Pinoy na nakabase sa United Arab Emirates bilang Hall Manager sa isang bilyaran, nang makapasok siya sa walo-kataong semifinals.

Hindi basta-basta ang mga naghangad na makaakyat sa trono pero pawang mga naglaway na lang dahil sa lupit ng Pinoy. Kabilang sa listahan sina Polish Konrad Jusczcyszy, Tyler Styler ng United States, mainstay ng World Cup of Pool Champion Austria na si Mario He, Hapones na si Naoyuki Oi, ang Rusong si Ruslan Chinakhov, Ralf Souquet ng Germany, Kastilang si David Alcaide at ang Italyanong si Stefano Delano.