Maluto, ang bagong bituin ng PHL Billiards

ni Eddie M. Paez Jr. - @Sports | February 9, 2021

Nasingitan ni Aivhan Maluto ng Pilipinas ang karamihan sa mga de-kalibreng cue artists mula sa iba’t-ibang parte ng daigdig upang maangkin ang pangalawang puwesto sa pagtatapos ng malupit na bakbakang tinawag na Poison VG 10-Ball 2.0 Virtual Tournament.

Nakipagtagisan nang husto ng galing si Maluto sa finals laban kay Konrad Juszczyszyn ng Poland. Sa Polish napunta ang unang laban, 6-5. Nakarebanse ang Pinoy sa pangalawa sa kapareho ring iskor (6-5). Sa winner take all match, kinapos si Maluto, 4-6, kaya napunta sa Poland cue artist ang korona. Halagang $5,500 ang napagwagian ng pambato ng Poland samantalang may pabuyang $3,500 si Maluto.

Nag-ambisyong magkampeon o kahit man lang makapasok sa finals ang mga bigating sina Estonian Dennis Grabe (dating hari ng Austrian Open at Slovenian Open); Dutch Niels “The Terminator” Feijen (2014 World 9-Ball king), batikang Finnish Mika “Iceman” Immonen, Greek Alexander Kazakis (European 10-Ball ruler); Rusong si Fedor “Viking” Gorst (hari ng 2019 World 9-Ball tilt), Czech ace Roman Hybler (siga dati sa German Open); Austrian Albin Ouschan (2016 world 9-ball winner; 2017 at 2019 World Cup of Pool titlist); Polish Mieszko Fortunski (topseed) at Hapones na Naoyuki Oi (4th ranked). Lahat sila ay umuwing nakayuko at ang apat sa huling mga nabanggit ay direktang nakatikim ng angas ng noon ay hindi kilalang Pinoy.

Sabit kay Maluto si Hybler noong qualifiers, si Ouschan ay tumiklop sa round of 16, napauwi si Fortunski noong quarterfinals habang sa semis namaalam si Oi.

Hindi nga naririnig ang pangalan ni Aivhan kaya dehadong-dehado sa kanila ang manunumbok na konektado sa Powerbreak Billiards Hall ng Abu Dhabi, United Arab Emirates. Si Maluto ay pangalawa lang sa Group 4 qualifiers. Bukod dito, ang tangi niyang ingay na nagawa bago ang torneo ay nang magkampeon ito sa isang qualifying tournament ng Predator One Pool 10x4 10-Ball Championship.

Ngunit dahil sa mga higanteng pinabagsak at dahil sa nasikwat na runner-up finish, pormal nang siyang tumawag ng pansin. “... Great tournament for Aivhan Maluto. I suspect we are going to seeing A LOT from this player moving forward!!” pahayag sa social media ng tagapangasiwa ng paligsahan bilang pagkilala sa narating ng Pinoy.

Iloilo Knights, pinatiklop ang "Siga ng Norte" sa PCAP

ni Eddie M. Paez Jr. - @Sports | February 8, 2021

Ipinatikim ng Iloilo Kisela Knights sa Caloocan “Siga ng Norte” Loadmanna Knights ang saklap ng unang pagkatalo, 11.5-9.5, upang maging instrumento sa pagkabulabog ng leaderboard noong Sabado ng gabi sa virtual matches ng Professional Chess Association of the Philippines (PCAP) All Filipino Conference.

Pagkatapos nito ay inilampaso ng Iloilo, pinamumunuan ni GM Rogelio "Joey" Antonio, Jr., ang Cagayan Kings, 18.0-3.0, samantalang nang nahimasmasan ang Caloocan, nakasandal sa liderato nina International Master Paulo "fastestmanalive" Bersamina at IM Juan Emmanuel Garcia, upang maibagsak ang Iriga City Oragons, 15.5-5.5.

Dahil dito, muling nagkita ang Caloocan at San Juan Predators sa tuktok ng North Division dala ang kartadang 12-1 panalo-talo habang magkakasalo na sa liderato ng South Division ang Iloilo, Camarines Soaring Eagles at Negros Kingsmen bitbit ang kani-kanyang 11-2 na rekord malaking susi ang panalo ng Iloilo laban sa Caloocan. Nasa pangatlong puwesto sa North Division ng pinakaunang professional chess league sa Timog Silangang Asya ang Laguna Heros na may kagaya ring grado na 11 panalo mula sa 13 matches.

Naitakas ng San Juan, sa pamumuno ni GM Oliver Barbosa, ang mga panalo kontra sa Zamboanga Sultans, 15.0-6.0, at Camarines, 14.0-7.0 samantalang kinaldag ng Negros ang mga karibal mula sa Olongapo, 16.0-5.0 bago ito nasingitan ni IM John Marvin Miciano at ng mga Manila Indios Bravos, 10.0-11.0. Ang Camarines ay nakaukit ang panalo mula sa pakikipagharap sa Antipolo Cobras, 13.5-7.5 sa iba pang resulta ng mga sagupaang north vs. south na tema. Base sa tuntunin ng paligsahan, pagkatapos ng round robin sa kani-kanyang dibisyon, sasagupain ng bawat koponan ang mga karibal sa kabilang pangkat.

Bagsik ni Maluto, umubra, pasok sa final ng VG 10-Ball

ni Eddie M. Paez Jr. - @Sports | February 7, 2021

Lumagpak ang pangatlong higanteng manunumbok sa angas ni Aivhan Maluto ng Pilipinas upang maipagpatuloy sa kanyang paninira sa script ng mga eksperto at mga miron at matagumpay na makapasok sa finals kontra kay Polish ace Konrad Juszczyszyn ng tutuldukan nang 2020 Poison VG 10-Ball 2.0 Virtual Tournament.

Nasingitan ni Maluto si Japanese champion Naoyuki Oi para sa pagpasok sa championship round habang si Jim Telfer ng USA ang naging biktima ni Juszczyszyn sa mga bakbakan sa final 4.

Hindi pamilyar sa mga billiards aficionados sa buong mundo ang pangalan ni Maluto pero sa torneong nabanggit ngayong panahon ng pandemya, nasaksihan ang bangis ng sumibol na bituin ng Philippine biliiards. Kabilang sa mga nakatikim ng bagsik niya ay sina dating world 9-ball champion at 2-time World Cup of Pool winner mula sa Austria na si Albin Ouschan (round of 16), European titlist mula sa Poland na si Mieszko Fortunski (quarterfinals) at ang 4th ranked na Hapones.

"Aivhan Maluto on the other hand has been a COMPLETE monster killer the entire event. If you have not heard of this player before, I advise remembering it from here. This guy is a BEAST. The only match he has lost the entire event was when Kelly Fisher ran a perfect 8 out of 8 set against him in the qualifiers. From there, he qualified for the Kamui Playoffs and beat defending champion and a world champion Ouschan Albin, then bear the overall number 1 seed Mieszko Fortunski, before beating number 4 overall seed Naoyuki Oi in his semifinal matchup, this guy is on a run with destiny!!" pagsasalarawan sa Facebook page ng mga tagapangasiwa ng paligsahan sa nanonorpresang Pinoy.

Si Maluto ay sobrang dehado laban kay Fortunski. Ang huli ay namayagpag sa Italian Open (2016) at sa European Championships (2015, 2018, 2019). Hindi binigyan ng tsansang magwagi ang Pinoy sa duwelo nila ng Austrian dahil bukod sa wala siyang marka sa pandaigdigang entablado ng pagtumbok, malupit na kalaban talaga si Ouschan.