Batang Aguilar, Perez at Marticio namayagpag sa Nat'l Age Group Chess

ni Eddie M. Paez Jr. - @Sports | April 11, 2021

Pinangunahan ng mga kabataang trio na sina Arvie Aguilar, Robert James Perez at Jersey Marticio ang mga namayagpag sa National Age Group Chess Championships - Northern Luzon Leg matapos nilang tapusin ang paligsahan na pulos panalo lang ang marka sa kani-kanyang mga grupo.

Humugot ng pitong panalo mula sa pitong yugto ng pakikipagtagisan ng galing sa ahedres si Aguilar, no. 4 sa pre-tournament rankings dahil sa 2024 na rating, upang makuha ang unang puwesto sa Under 20 - Open Division. Dalawang puntos sa likuran ng kampeon sina Joseph Lawrence Rivera, Jerico Santiaguel at Jayvee Relleve na tumapos sa pangalawa, pangatlo at pang-apat na posisyon ayon sa pagkakasunod-sunod.

Ganito rin ang naging istorya sa labanang nangyari sa Under 18 - Open nang perpektong iskor ang isinumite ni Perez (rating:1968) sa kompetisyon sa age bracket na nilahukan ng 19 na mga aspirante. Kagaya rin ni Aguilar, 4th seed si Perez. Nakuntento sa pangalawang puwesto si Mark Gerald Reyes (6.0 puntos) samantalang nasa pangatlong baytang si John Lance Valencia (5.0 puntos).

Ang dalagitang si Marticio ang runaway winner sa Under 18 Girls bracket dahil sa 7/7 na produksyon niya. Dalawang puntos ang agwat nito sa mga bumuntot sa kanyang sina Marian Calimbo (2nd) at Darlyn Villanueva (3rd) sa tunggaliang nilapatan ng "10-minuto, 5-segundo" time control.

Kasama pa sa mga nagmarka sa kompetisyong inorganisa ng National Chess Federation of the Philippines (NCFP) sina Ma. Elayza Villa (U20 -Girls), Ritchie James Abeleda (U16 - Open), Jelaine Adriano (U16 - Girls), Joemel Narzabal (U14 - Boys), Kaye Lalaine Regidor (U14 - Girls), Sumer Justine Oncita (U12 - Boys), Pinky Cabrera (U12 - Girls), Ranzeth Marco Magallanes (U10 - Boys), Princess Rane Magallanes (U10 - Girls) at Glaiza Celine Romero (Under 8 - Open).

Meneses at Hernandez, maangas sa Nat'l Age-Group Chess Luzon

ni Eddie M. Paez Jr. - @Sports | April 9, 2021

Winalis ng 8-anyos na si Evan Meneses ang oposisyon upang makopo ang unang puwesto sa Under 08 na kategorya ng National Age-Group Chess Championship Southern Luzon Leg.

Anim na beses nasabak sa engkwentro si Meneses, 4th seed at may rating na 1311, pero mula rito ay kumulekta ito ng anim na panalo. Napasama sa mga biktima niya sina Steve Zacky Bolico, Drinian Villanueva, Darren Tanada, Jay Emmanuel Sotaridona, Prince Jhamie Reyes at Caleb Royce Garcia. Nakuntento sa pangalawang puwesto si Villanueva habang nasadlak sa pangatlong baytang si Garcia.

Si Lexie Grace Hernandez ay hindi nagalusan sa kompetisyon sa U16-G para sa perpektong 7 puntos. Malayong pangalawa si Nicolle Ayana Usman (5.5 puntos) habang lalo pang nasa likuran bilang pangatlo si Yana Emilou Devera (4.5 puntos).

Halos perpekto rin ang naging rekord ng mga nangibabaw sa ibang pangkat na sina Jarvey Labanda (U20-B), Juncin Estrella (U14-B), John Curt Valencia (U10-B) at Christian Tolosa (U10-B). Anim na panalo at isang tabla ang ipinoste ni Labanda (rating: 2056) para sa 6.5 na rekord na nagtulak sa kanya sa trono ng U20. Malayong segunda ang limang puntos nina Joshua Navarro at Carl Anthony Canio. Ganito rin ang kwento sa sagupaang U14-B nang magsumite si Estrella (rating: 1877) ng 6.5 puntos. Segunda si Genesis Jahk Andres (5.0 puntos) at tersera si Phil Martin Casiguran (5.0 puntos).

Photo-finished sina Valencia at Tolosa sa U10-B dahil kapwa sila nakakolekta ng tig-6.5 puntos pero kay Valencia napunta ang unang puwesto dahil sa mas mataas na tiebreak points.

Pinoy cue artists, shoot sa WPA at Matchroom World Ratings

ni Eddie M. Paez Jr. - @Sports | April 8, 2021

Kabilang ang mga premyadong Pinoy cue artists na sina Alex " The Lion " Pagulayan, Carlo “The Black Tiger” Biado, Johann "Bad Koi" Chua, Dennis “Robocop” Orcullo, Anton " The Dragon" Raga, Lee Van "The Slayer" Corteza at Zorren James "Dodong Diamond" Aranas sa mga piling personalidad na bumabandera sa larangan ng pagtumbok ayon sa World Pool Billiards Association, Fargo Ratings at sa Matchroom rankings.

Si Pagulayan, dating world 9-ball king na tubong Isabela, ay pampito sa WPA rankings dahil sa naipon nitong 16,215 puntos; pang-13 naman sa listahan ng world governing body si Japan Open winner Chua (14,151 puntos) habang pang-15 naman si Biado, naging World Games gold medalist at World 9-Ball champion noong 2017, sa nakulektang 13,700 puntos. Sa sistema ng WPA, piling mga paligsahan lang maaring kumuha ng puntos ang mga manlalaro.

Nakaupo naman sa pang-anim na baytang ng Fargo World Rating si China Open runner-up Raga (821 puntos) habang tangan ni one-time World 8-Ball champ Orcullo (817 puntos) ang pang-10 puwesto. Si Orcullo ay nagbigay na rin minsan sa Pilipinas ng titulo mula sa prestihiyosong World Cup of Pool.

Nasa listahan din ng mga Fargo “idols” si Pagulayan na nasa pang-13 posisyon kasosyo si Corteza dahil pareho silang may 813 puntos; yakap ni Biado (812 puntos) ang pang 16 na upuan; kapit-tuko naman sina Aranas (806 puntos) at Banares (805 puntos) sa pang-19 at pang-20 luklukan ayon sa pagkakasunod. Sa tuntunin ng Fargo, tumataas ang rating ng isang manlalaro kung saan tinalo niya ang isang karibal na may mas mataas na rating. Ang talunang katunggali ay nababawasan din ng rating. Ang sistemang ito ay katulad ng ginagamit ng FIDE sa mga chessers.

Si Aranas ang tanging Pinoy sa Matchroom Pool World Rankings dahil sa natipon nitong 86 puntos na sapat na para sa pang-anim na puwesto.