Planong milk tea shop, purnada dahil sa pandemya

Dear Roma Amor - @Life & Style | July 13, 2020

Dear Roma,

Ako si Yeri, 30. Bago mag-lockdown, nag-resign ako sa trabaho bilang researcher. Wala akong balak maghanap ng lilipatan dahil bago pa ako mag-resign, plano ko nang mag-business. Ang problema, napurnada ang plano kong magtayo ang milk tea shop dahil sa lockdown. Mayroon na akong puwesto, kaunting renovation at ayos na lang, puwede nang buksan, kaso ngayon, nagdadalawang-isip ako kung itutuloy ko ito dahil baka hindi ko mabawi ang ilalabas kong pera. Sa tingin mo, okay kayang ituloy ito ngayon? –Yeri

Yeri,

‘Ika nga, risky sumabak sa pagnenegosyo dahil hindi mo alam kung papatok ito, lalo pa ngayong may krisis. Pero kung nagdadalawang-isip ka, puwede mo namang ituloy ang plano mong negosyo, pero lagyan mo ng kaunting pagbabago. Halimbawa, for take-out o delivery lang ang mga produkto mo. Sa ganitong paraan, makakatipid ka sa kuryente o iba pang utilities dahil walang mag-i-istambay sa shop mo, gayundin, mababawasan ang exposure n’yo ng mga staff mo sa inyong kostumer. Easy lang, maraming paraan para makapagnegosyo ngayon. Good luck!

Problemado sa BF na nawalan ng trabaho

Dear Roma Amor | July 6, 2020

Dear Roma,

Tawagin mo na lang akong Reede, 23. May boyfriend ako at nang nagsimula ang lockdown, nawalan siya ng trabaho dahil tumigil sa operation ang resto na pinagtatrabahuhan niya. Ngayong open na ulit ang resto, nagbawas naman ng empleyado ang kanilang boss, pero nakasama siya sa lay-off. Ngayong tambay siya, napansin kong naging sensitive siya pagdating sa topic na trabaho. Tuwing tinatanong ko kung may plano na siyang maghanap ng lilipatan, parang naiirita siya at ayaw niyang pag-usapan. – Reede

Reede,

Sa panahon ngayon, masakit at mahirap mawalan ng trabaho. Kung feeling mo ay ayaw niyang pag-usapan ang susunod niyang mga plano, hayaan mo muna siya. Baka kailangan niya pa ng time mag-adjust at tanggapin na wala siyang kayod. Ang magagawa mo ngayon ay suportahan siya at ipaalala na magkakaroon din siya ng pagkakakitaan. Tiyaga at pasensiya lang, Reede. Kaya niyo ‘yan, good luck!

Takot mawalan ng trabaho dahil magbabawas ng empleyado

Dear Roma Amor - @Life & Style | July 5, 2020

Dear Roma,

Ako si Ana, 28 at nagtatrabaho sa isang printing shop. Sa totoo lang, natatakot akong mawalan ng trabaho dahil noong nag-lockdown, nagsara ang shop kaya “no work, no pay” ang siste. Mabuti na lang, nakatanggap kami ng ayuda at ngayong nagbukas na ulit ang shop, kakaunti lang ang kita at sabi ng boss ko, lugi pa siya sa pagpapasuweldo sa amin. Ang sabi tuloy ng mga kasamahan ko, posibleng magbawas ng empleyado sa amin dahil hindi pa nakakabalik sa normal ang kita. Ang ikinakatakot ko, baka masama ako sa mawawalan ng trabaho. Sa hirap ng buhay ngayon, hindi ako puwedeng mawalan ng pagkakakitaan. –Ana

Ana,

Tulad ng sinabi mo, sabi-sabi lang ang posibilidad na pagbabawas ng empleyado kaya hangga’t hindi pa ito kinukumpirma ng boss mo, ‘wag ka munang mag-alala. Sa ngayon, magpokus ka sa iyong trabaho o maghanap ng iba pang pagkakakitaan o sideline. ‘Wag kang maging nega at ipagdasal mo na bumuti ang sitwasyon para bumalik sa normal ang lahat at walang mawalan ng hanapbuhay. Kaya mo ‘yan, good luck!