Problemado dahil ‘di mabalanse ang work from home at pagiging tita

Dear Roma Amor - @Life & Style | August 10, 2020

Dear Roma,

Itago mo na lang ako sa pangalang Mae. Nahihirapan kasi ako sa sitwasyon ngayong pandemic dahil working from home ako. May ate ako na may anak, tapos madalas wala siya sa bahay dahil pumapasok siya sa opisina. Ang nangyayari, ako ang naoobligang mag alaga sa anak niya, Roma. Minsan, nakakainis na dahil hindi ako makapag-focus sa trabaho ko. Ano ba ang dapat kong gawin? Hindi naman ako makapagsabi sa kanila na huwag ako ang obligahin dahil may trabaho kasi sigurado akong ‘di naman nila maiintindihan. Minsan ko na ring sinabi ‘yun sa iba ko pang mga kapatid, Roma pero nagalit lang sila sa akin. Ano ba ang dapat kong gawin para mabalanse ko ang pagiging tita habang naka-work from home? –Mae

Mae,

Totoong mahirap balansehin ang trabaho at responsibilidad sa bahay, lalo na kung hindi ito nauunawaan ng mga kasama mo sa tahanan. Mabuting ipaliwanag mo sa iyong kapatid na hindi sa lahat ng oras ay puwede kang mag-alaga. Siguro kasi, nasanay siya na palagi kang nand’yan, kaya akala niya ay okay lang. Mahalagang maipaunawa sa kanya na may sarili kang responsibilidad na dapat gampanan, gayudnin, kailangan mo lang itong pag-isipan kung sa paanong paraan. Sa ngayon, kung ano ang oras na kayang mong ibigay sa pamangkin mo, ‘yun lang ang iyong ilaan para hindi siya masanay na palagi kang available. Okie? Good luck!

‘Di na masaya sa relasyon pero buntis ang gf

Dear Roma Amor - @Life & Style | August 6, 2020

Dear Roma,

Tawagin mo na lang akong Jake, 32, at may girlfriend ako na 25-anyos. Kung tutuusin, pareho na kaming nasa edad, ngunit pakiramdam ko ay wala sa edad ang pagpasok sa relasyon at pagpapamilya.

Sumulat ako dahil hindi ko na rin alam ang dapat kong gawin. Hindi tanggap ng aming pamilya ang relasyon namin. Sinusubukan naming maging maayos ang lahat, lalo pa at nalaman naming buntis siya. Dahil hindi kami tanggap ng pamilya ng isa't isa, nagpasya kaming bumukod. Walang problema sa pera dahil pareho kaming may hanapbuhay, ngunit napapadalas ang alitan namin dahil sa mga salita ng iba, lalo na ng kani-kanyang partidos.

Tama ba na ituloy namin ang aming pagsasama gayung hindi na rin kami magkasundo at palaging nag-aaway? Handa akong panagutan ang bata, ngunit pakiramdam ko ay masyado nang toxic ang relasyon namin. Ipinaglalaban ko siya, pero marahil, kahit sino ay susuko, lalo na kung ang ipinaglalaban mo ay hindi ka kayang ipaglaban. Mahal ko siya, Roma, pero ipinararamdam niya sa akin na hindi na siya masaya sa piling ko. Sakaling bitawan ko siya ay mahanap niya ang lalaking makapagpapasaya sa kanya.

Tama ba na ipagsiksikan ko pa ang sarili ko sa babaeng hindi na masaya sa akin o tama ang iniisip kong hiwalayan na siya para sa sarili niyang kaligayahan? –Jake

Jake,

Sa totoo lang, napakahirap ng sitwasyon mo, gayung may paparating kayong supling. At ito ang isa sa dapat na ikonsidera kung ipagpapatuloy n’yo ang inyong relasyon. ‘Ika nga, mahirap magpalaki ng anak kung magkahiwalay ang mga magulang, pero hindi ba, mas mahirap ‘pag lumaki ang bata nang buo ang pamilya, pero hindi niya nakikitang nagmamahalan ang kanyang mga magulang?

Pag-usapan n’yong mabuti kung ano ang mangyayari sa inyong relasyon dahil this time, hindi lang kayo magde-desisyon para sa inyong mga sarili kundi pati na rin sa inyong magiging anak.

‘Wag mong madaliin ang pagde-desisyon at isipin mo rin ang kalagayan ng iyong GF gayung buntis siya. Kaya mo ‘yan, good luck!

Problemado sa pang-tuition ng mga anak

Dear Roma Amor - @Life & Style | August 1, 2020

Dear Roma,

Tawagin mo na lang akong Tere, may tatlong anak ako at dalawa sa kanila ay nag-aaral pa. Ang panganay kong lalaki ay nagtatrabaho na at tumutulong sa aming mag-asawa. Namomroblema ako ngayon dahil may utang pa ako sa tuition ng pangalawa kong anak. Kailangan na niyang mag-enroll sa college, pero wala kaming kapera-pera dahil noong lockdown, natigil sa trabaho ang mag-ama ko. Naaawa ako sa mga anak ko dahil kung hindi sila makapag-e-enroll ngayon, sayang naman ang panahon, gayung masisipag silang mag-aral at maganda naman ang kanilang grades. Isa pa, dahil dalawa silang mag-aaral, dapat na rin akong maghanap ng magagamit nilang computer. –Tere

Tere,

Hindi ka nag-iisa dahil malamang, marami ring ina na tulad mong problemado para sa pag-aaral ng kanilang mga anak. Pero ‘wag kang mawalan ng pag-asa dahil tulad ng sinabi mo, maganda ang grades ng mga anak mo, mag-apply kayo ng scholarship. Marami pa r’yan ang tumatanggap ng scholar at tiyak na makakahanap din kayo. Hindi man full scholarship, at least, may matitipid kayo. Malalampasan n’yo rin ‘yan. Good luck!