Imbyerna sa classmate na nerd kaya ‘di makasundo

Dear Roma Amor - @Life & Style | August 30, 2020

Dear Roma,

Ako si Ayesha, 18 years old. Friendly akong tao pero mayroon akong kakilala na talagang ayoko sa kanya. Para kasi sa akin, napaka-negative niyang tao at wala siyang ka-class-class. Ayaw din sa kanya ng halos lahat ng kaklase namin dahil masasabing mahirap lang din sila at ewan ko ba kung bakit sa school namin siya nag-enroll. Actually, scholar siya kaya nerd type na loner. Basta, ayaw talaga namin ng barkada ko sa kanya. Friendly naman ako at mahilig akong manlibre ng mga kaklase, siguro isa pang dahilan ‘yun kaya halos lahat sa eskuwelahan ay kaibigan ko. Pero pagdating sa kanya, hindi ko siya ma-take, kumbaga, naiinis ako sa kanya. Matalino siya kaya ru’n lang kami nagkakasundo kasi tinuturuan naman niya ako kapag ‘di ko alam, pero after nu’n, ewan ko ba, parang hindi ko talaga siya bet. Ano ba ang dapat kong gawin para masabi ko sa kanya na ayoko siya? Kung gusto niyang maging kaibigan ko, magpaka-class naman siya kahit konti lang.

– Ayesha

Ayesha,

Sa totoo lang, may mga tao talagang hindi natin gusto kahit friendly tayo. Pero isipin mo, dapat ba talagang sabihin mo sa kanya na ayaw mo sa kanya o baka mas mabuting ikaw na lang ang umiwas kung hindi talaga kayo magkasundo?

Minsan kasi, hindi na natin kailangan gawing isyu ang ibang bagay, lalo na kung wala namang ginagawang masama sa ‘yo ang ibang tao. Gayundin, kailangan mong tanggapin hindi lahat ng tao ay makakasundo mo sa lahat ng bagay, kaya kung wala kang intensiyon na makipag-kaibigan sa kanya, ‘wag ka nang magpaka-stress dahil lang hindi mo siya bet. Pero kung gusto mo talagang makipagkaibigan sa kanya, bigyan mo pa ng chance. ‘Wag mong ibase sa pagiging ‘nerd’ niya o kawalan ng class ang dahilan para hindi makipagkaibigan. Good luck!

Bread winner na kapos sa pantustos

Dear Roma Amor - @Life & Style | August 29, 2020

Dear Roma,

Ako si Abi, 28 at bread winner ng pamilya. Hirap na hirap na ako sa sitwasyon ng aming pamilya ngayong may pandemic. Isa akong minimum wager, kaya masasabi kong napakaliit ng suweldo ko, tapos ngayon, ilang araw na lang ang ipinapasok ko sa trabaho kaya ang maliit kong kinikita ay lalo pang lumiit. May naipon naman ako, pero unti-unti na ‘yung nabawasan dahil sa patung-patong na bills at iba pang gastusin. Kahit super-tipid namin, hindi ko na talaga kayang suportahan ang pamilya ko, tapos may kapatid pa akong estudyante. Roma, hirap na hirap na ako, ano pa bang dapat kong gawin?

– Abi

Abi,

Sa totoo lang, hindi ka nag-iisa dahil for sure, marami ring iba r’yan na kapareho mo ng pinagdadaanan. Tulad ng sinabi mo, nabawasan ang araw ng pasok mo kaya sa mga araw na wala kang trabaho, subukan mong mag-sideline. Halimbawa, kung may kaibigan o kakilala kang naghahanap ng reseller o tutulong sa kanya na magtinda, subukan mo dahil wala namang mawawala. Gayundin, kung may magaling magluto ng ulam sa inyo, puwede ka ring magsimula rito. Oks lang ‘yan kahit malayo sa nakasanyan mong trabaho dahil ang importante, kikita ka sa malinis na paraan at madadagdagan ang pantustos mo sa iyong pamilya. Okie? Good luck!

Imbyerna sa utol na ayaw mag-resign sa trabaho

Dear Roma Amor - @Life & Style | August 24, 2020

Dear Roma,

Itago mo na lang ako sa pangalang Ash dahil avid fan ng BULGAR ang kapatid ko.

Sumulat ako sa 'yo, Roma, dahil naiinis ako sa kanya. Napaka-negative niya kasi sa buhay. Actually, lahat halos kaming mga kapatid niya ay naiinis sa kanya. Mahirap kasi siyang intindihin. Moody at palagi pang nakasigaw.

Nauunawaan kong maaaring dulot lang ng stress sa trabaho kaya siya ganu'n, lalo na ngayong MECQ dahil sa COVID-19 na working from home na siya at maliit lang ang sinusuweldo pero sana lang, 'wag niyang ibuhos sa aming mga kapatid niya ang stress niya. Lahat naman ng kumpanya ngayon, nagbawas ng suweldo at worst, nagbawas ng manggagawa.

Pinagre-resign na nga siya sa trabaho ng iba naming kapatid dahil sigurado namang marami ring kumpanya ang mapapasukan niya pero sa hindi namin maintindihang rason, ayaw niyang iwan ang trabaho niya.

Para sa akin, Roma, family first always kaya masakit na parang mas pinahahalagahan niya ang trabaho kaysa sa aming pamilya niya.

Mali ba ako kung makaramdam ako ng inis sa kanya, Roma? Mali ba ako na mag-demand akong 'wag niyang iparamdam sa amin ang stress niya? Mali ba kami na pag-resign-in siya sa trabaho niya gayung alam namin ang kakayahan niya?

– Ash

Ash,

Siguro, mabuting makausap mo muna nang masinsinan ang kapatid mo.

Kahit malawak ang sakop ng kanyang kakayahan, siguro hindi natin alam kung ano ang pakiramdam niya tuwing nagtatrabaho siya. Masaya ba siya roon o nakararamdam siya ng comfort sa araw-araw na ginagawa niya?

Ngayong panahon ng pandemya, kailangan natin ang isa’t isa at kung may maio-offer kang tulong, go na. ‘Wag niyo siyang i-pressure na iwanan ang kanyang trabaho at tanggapin mo rin na lahat ng tao ay may iba’t ibang prayoridad.

Kung napapansin mong moody siya, obserbahan mo muna siya. Mahirap din kasi na basta na lang tayo naiinis sa isang tao dahil sa ugaling naipakita niya nang ilang beses.

Imbes na patigilin siya sa trabaho, alamin mo kung paano siya matutulungan na mawala ang pagka-nega niya. Kaya n’yo ‘yan. Good luck!