‘Di makatanggi sa crush kahit ginagawang pampalipas-oras

Dear Roma Amor - @Life & Style | September 24, 2020

Dear Roma,

Ako si Micah, 19 years old. May crush ako na 25-anyos, pero hindi niya alam ang feelings ko for him. Nasa Australia siya ngayon at doon naabutan ng lockdown. Madalas kaming nagkaka-chat ngayong quarantine.

May mga times na pakiramdam ko ay may pagtingin din siya sa akin, pero minsan naman ay feeling ko wala at parang past time lang ako. Sa tuwing nararamdaman kong parang pampalipas-oras lang ako, I always decide na ‘wag na siyang i-chat or huwag nang reply-an ang messages niya. But maybe because I'm marupok, I can't...

Roma, help me naman, oh. Ano ba ang gagawin ko? How can I stop being marupok? –Micah

Micah,

Una, kailangan mong malaman kung ano talaga ang estado ng relasyon n’yo. Mahirap kasing mag-assume dahil nakakagulo lang ito ng isipan.

Kung pakiramdam mong hindi ka niya pinahahalagahan, ikaw na ang unang umalis dahil hindi mo deserve ang ganu’ng klase ng tao. Know your worth dahil kung tutuusin, bata ka pa at marami ka pang makikilala kaya ‘wag kang matakot mag-let go ng mga taong hindi worth it. Kaya mo ‘yan. Good luck!

Nagdadalawang-isip mag-resign dahil ‘di na kaya ang pressure sa work

Dear Roma Amor - @Life & Style | September 16, 2020

Dear Roma,

Tatlong taon na ako sa work ko at isa akong regular employee. Nu’ng una, okay naman at nag-e-enjoy ako sa trabaho dahil marami akong natututunan. Pero last year, kinailangang palitan ang secretary sa isang department sa office at ako ‘yung ipinalit. Tinanggihan ko sa simula dahil hindi ko ‘yun forte, pero in-insist nila kasi walang ibang puwede umupo ru’n.

It's been 9 months nang malipat ako, pero same salary since 3 years ago, but ‘yung responsibility ay sobrang bigat kumpara sa actual position ko. On call ako, as in, even on holidays and late nights, kailangan kong mag-work without pay. Nawalan na ako ng peace of mind at motivation. Parang robot na lang ako na sumusunod sa utos. I asked a lot of times na ibalik na ako sa original station ko, pero hindi pa rin ako binalik kasi walang papalit sa ‘kin.

Naiisip kong mag-resign kasi sobrang hirap na, lalo na ‘yung work from home. Nag-hesitate lang ako dahil ito lang ang source of income ko. Should I stay or leave? –Gracey

Gracey,

Kung wala nang reason para mag-stay, mabuti pang mag-resign ka na, pero tulad ng sinabi mo, hesitant ka pa dahil ito lang ang iyong pinagkakakitaan. Siguro, mabuting planuhin mo muna kung paano ka makaka-survive nang walang regular work. Kung may savings ka na magtataguyod sa iyo, go lang, pero kung wala, isipin mo ang susunod mong hakbang. Puwede kang magnegosyo muna o maghanap na lang ng ibang papasukan. I’m sure na may iba pang oportunidad na naghihintay sa ‘yo kaya ‘wag kang matakot na hanapin ito. Sabi nga, kung apektado na ang peace of mind mo, it’s also a sign na maghanap ng ibang trabaho. Good luck!

Gusto mag-stop sa iskul dahil feeling pabigat

Dear Roma Amor - @Life & Style | September 14, 2020

Dear Roma,

Tawagin mo na lang akong Jel. Ako ay incoming second year college student sa kursong Journalism. Alam naman natin na lahat tayo ay kailangan mag-adjust ngayong may pandemic at kasama na roon ang pagpasok sa school. Sa totoo lang, parang ayaw ko munang mag-enroll ngayong taon dahil iniisip ko pa lang ang kailangang gastusin ng parents ko para sa tuition at gadget, nanghihinayang na ako. Kinausap ko na sina mama at papa tungkol dito, pero sabi nila, ‘wag daw akong hihinto sa pag-aaral hangga’t kaya nila akong pag-aralin. Feeling ko kasi, pabigat ako dahil nawalan ng work ang papa ko, tapos mag-isang nagtatrabaho ang mama ko. Sa tingin mo, Roma, dapat ko bang sundin ang desisyon ng mga magulang ko? –Jel

Jel,

Alam mo, nakatutuwa na talagang nagsisikap ang mga magulang mo na mapag-aral ka kahit mahirap ang buhay ngayon. ‘Wag mong isipin ang gastusin dahil hindi ka pababayaan ng parents mo. Ang dapat mong gawin ngayon ay magpokus ka sa iyong pag-aaral at ‘wag sayangin ang kanilang tiwala. Magpasalamat ka pa rin dahil may mga magulang kang handang sumuporta sa iyo. Tulungan mo sila sa iba pang paraan at pagbutihin mo ang iyong pag-aaral. Good luck!