Buntis na wa’ work sa Maynila, kinukulit pa na magpadala ng sustento sa pamilya

Dear Roma Amor - @Life & Style | October 1, 2020

Dear Roma,

Ako si Angelica, 25, at may asawa na. Nasa Manila ako ngayon at may maselang pagbubuntis. Parehas kaming unemployed ng mister ko dahil kailangan niya akong bantayan kasi wala akong kasama sa bahay. Uuwi sana kami sa probinsiya kung walang pandemic, pero mas gusto niyang dito na lang ako manganak.

Nakakasama ng loob dahil pinararamdam ng pamilya ko na masamang anak ako. Kinukulit ako ng kaptid ko na magpadala sa kanila dahil sampung buwan na akong walang padala kasi wala naman akong maibibigay. Nakaasa lang kami sa ipon ng mister ko, hindi tulad nila na may pinagkakakitaan naman kahit papaano.

Ang sakit lang kasi kung anu-ano’ng masasamang salita ‘yung sinasabi nila sa akin.

Hindi naman ako madamot dahil bago ako nag-asawa, masasabi kong nakatulong naman ako sa kanila, pero ngayon, hindi talaga kaya dahil marami rin kaming gastusin para sa check-up, bills at pagkain.

Masama bang unahin ang sarili kong pamilya? Sobrang stressed na ako dahil gusto ko rin namang tumulong, pero wala akong maibigay. Meron akong kaunting ipon para sa sarili ko, pero maliit na halaga lang ‘yun at gusto nilang bawasan ko para makapagpadala naman daw ako sa kanila. Ano bang dapat kong gawin? –Angelica

Angelica,

Nakakalungkot dahil kailangan mo ‘yang pagdaanan. Sa totoo lang, hindi ka naman na responsable sa iyong mga magulang ngayong may sarili ka nang pamilya. Kung anuman ang naitulong mo sa kanila noong dalaga ka, sapat na ‘yun, at ‘di ka na nila dapat bigyan pa ng obligasyon ngayon. Hindi masama na unahin ang sarili mong pamilya dahil ‘yun naman ang dapat. Gayundin, oks lang tumulong, pero kung wala talaga, dapat mong ipaunawa sa kanila ang sitwasyon mo. Ipaliwanag mo na ‘di madaling mabuhay nang walang trabaho at nagsisikap din kayong makaraos sa araw-araw. Kung hindi pa rin nila maunawaan, mas mabuting dedmahin na lang sila. Ganyan talaga ang buhay, may mga toxic na pamilya na dapat nang dedmahin para makapamuhay nang payapa. Kaya mo ‘yan, sis. Good luck!

Labs si BF pero wa’ kayod at ipon kaya takot mabokya sa future

Dear Roma Amor - @Life & Style | September 28, 2020

Dear Roma,

Tawagin mo na lang akong Ruthie. May BF ako at wala akong doubt sa pagmamahalan namin dahil 10 yrs. na kami. Pero recently, lagi akong napapaisip sa future. ‘Yung BF ko kasi ay walang maayos na work at hindi nakapag-college, kaya wala rin siyang ipon.

Naisip ko lang, paano ‘yung future namin together? Siya ‘yung tipo ng tao na mabait at aalagaan ka, pero sa financial part, wala talaga siya.

Laki ako sa hirap kaya tumagal kami dahil hindi ako naging judgmental sa capacity niya to provide my needs, pero ngayon na future na ang pinag-uusapan, natatakot ako bigla, lalo na para sa mga magiging anak namin. Itutuloy ko pa ba ang relasyon namin o hindi? Sa totoo lang, 10 years ko na siyang pinupush na maghanap ng permanent work, pero mahina masyado ang loob niya. Sana, mabigyan n’yo ako ng advice. – Ruthie

Ruthie,

Kung tutuusin, sobrang haba ng 10 years para sa magkarelasyon. Kung frustrated kang malaman kung may plano siya para sa future, ‘wag kang mahiya na magtanong sa kanya. Pero siyempre, kasama ng mga planong ito ang pagsisikap na matupad ito. Mahirap kasi kung ikaw lang ‘yung mga plano tapos, naka-depende lang siya sa ‘yo. Kung wala talaga, it’s your call. Ikaw pa rin ang magdedesisyon niyan dahil future mo ang nakasalalay dito. Good luck!

Breadwinner na suko na sa mga demanding na magulang

Dear Roma Amor - @Life & Style | September 26, 2020

Dear Roma,

Ako si Elle, breadwinner at super-bigat sa feeling na ganito nangyari sa family ko. May hinihinging bagay ‘yung tatay ko, pero tumanggi ako dahil hindi ko ‘yun kayang ibigay, tapos nagtampo sila ng nanay ko kasi alam daw nilang malaki ang suweldo ko. Ang point ko naman, malaki nga ‘yung kinikita ko, pero malaki rin ang gastos namin. I’m so disappointed kasi sa kabila ng pagtatrabaho ko para maibigay yung masagana at marangyang buhay sa kanila, ganu’n pa sila mag-isip sa akin.

Ang totoo nga, deprived ako sa kasiyahan kasi instead na mag-enjoy ako sa buhay single, nagpapakahirap ako rito sa abroad. Lagi rin akong nag-oopen up sa kanila ng business like sari-sari store, kaso laging fail ang negosyo. Nakakapagod lang dahil nawala na parang bula yung inipon ko para ru’n.

Paano ba ang magandang approach para hindi sila aasa sa akin? Kaya pa naman nilang maghanapbuhay dahil malalakas pa sila. –Elle

Elle,

Alam mo, isa ‘yang toxic mentality dito sa atin, pero panahon na para sabihin sa kanila na hindi puwedeng forever silang umasa sa iyo, lalo na kung para sa materyal na bagay lang. Bilang mga magulang, alam nila kung gaano kahirap kumita ng pera, tapos nasa abroad ka pa at malayo sa pamilya. Ang una mong gawin ay magtabi para sa sarili mo dahil ‘pag ‘di mo ‘yan ginawa ngayon, ikaw din ang mahihirapan sa future. Nar’yan talaga ‘yung magtatampo sila, pero mauunawaan din nila ‘yan. Good luck!