Magdasal ka na, sister (7)

ni Maria Angela Gonzales @Kuwentong Pag-Ibig | November 8, 2023

“Sigurado ka ba sa sinasabi mo?” pagtatanong ni David.

Hindi napigilan ni Maritoni na mapailing, feeling kasi niya wala itong tiwala sa kanya. Sa bagay, hindi niya ito masisisi dahil napakabilis niya naman talagang husgahan si Mark Ferrer.

“Hinala pa lang naman, kaya nga gusto kong magpatulong sa’yo.” Wika niya

“Sinasabi ko na nga ba, sa oras ng kagipitan ako pa rin ang tatawagin mo,” tugon ni David sabay ngisi.

Tinaasan niya ito ng kilay at sabay sabing “Aba natural, ikaw ang partner ko, eh!”

“I love you, sweetheart.”

“Ipapasok mo na naman ba ‘yang panliligaw mo? Hindi ka ba nagsasawang makarinig sa akin na hindi tayo talo?! Wala akong panahon sa pag-ibig na ‘yan. Ang kailangan ko ngayon ay matapos ang misyon ko,” buong diin niyang sabi.

“Ang sakit mo namang magsalita. Wala kang awa sa puso ko,” madrama nitong tugon.

Kahit na masugid niya itong manliligaw, hindi pa rin siya naniniwala na inlab ito sa kanya. Kahit lahat ng atensyon ay ibinibigay nito sa kanya at hindi nag-i-entertain ng ibang babae, hindi pa rin siya kumbinsido.

Bahagya siyang umiling dahil ayaw na niyang mag-isip pa ng kung anu-ano. Ang kailangan niya kasing isipin ay walang iba kundi si Mark Ferrer lang. Muli na naman siyang umiling dahil may pagkakataon na sa sobrang pag-iisip niya rito, nagagawa na niya itong mapanaginipan, at dahil du’n ay nakakaramdam siya ng pagkainis.

“Huwag mo na kasi akong kulitin. Kailangan ko malaman ang background ni Mark Ferrer.

Hindi kasi ako basta-basta makakapag-imbestiga kung…” napahinto siya sa pagsasalita ng may ideya siyang naisip.

“Ano na namang kalokohan ang naiisip mo?” tanong sa kanya ni David.

Malalim na buntong hininga ang kanyang pinawalan bago siya magsalita. “Ano’ng kalokohan ang pinagsasasabi mo r’yan? Hindi ko alam ang sinasabi mo!” Tarantang tugon ni Maritoni.

“Maloloko mo ang lahat pati na ang sarili mo, pero hindi ako. Kilalang-kilala kita kaya alam kong mayroong naglalaro sa utak mo.”

“Mayroon nga,” wika niya.

“Eh, ano?”

Sa halip na sumagot ay hinawakan niya ang baba ni David saka pinaling-paling. Napangisi siya ng may ideyang pumasok sa kanyang isipan.

“What?” Pagtatakang tanong nito.

“Ang ganda mo siguro maging babae. Partner naman tayo, kaya ang problema mo ay problema ko rin. Kaya sa ayaw at sa gusto mo, tutulungan mo ako sa naisip kong gawin.” Seryosong sagot ni Maritoni.

Itutuloy…

Magdasal ka na, sister (6)

ni Maria Angela Gonzales @Kuwentong Pag-Ibig | November 7, 2023

Bago pumasok si Maritoni sa Task Force Dragons, itinanim na niya sa kanyang isipan na kailangan ay may lakas ng loob siyang harapin ang lahat ng kanyang responsibilidad. Kung tutuusin, malakas naman talaga ang kanyang loob, kaya nga nakikipagtugisan siya sa mga kriminal. May mga pagkakataon lang talaga na inaawat siya ni David. ‘Yun nga lang ay hindi siya nagpapaawat.

Gusto kasi niyang ipakita sa lahat na matapang siya, at kaya niyang makipaghabulan sa mga kriminal. Magaling din siyang humawak ng baril kaya nakakasiguro siyang magagawa niyang makipagpalitan ng bala sa mga ito. Ngunit, sa mga oras na iyon parang nawala lahat ng kanyang tapang.

Nanghihina siya tuwing nakakarinig siya ng pag-iyak ng mga naulilang pamilya ng biktima.

Nais nilang kumpirmahin ang balitang nakarating sa kanila na nakapagpabaligtad ng kanilang sikmura, at nakita nga ng dalawa niyang mata ang sinapit ni Sister Luna na ang ulo nito ay nakahiwalay na sa kanyang katawan.

Kung hindi lang niya napigilan ang kanyang sarili, tiyak na katakut-takot na katanungan ang ibabato niya sa mga awtoridad. Nais sana niyang malaman kung paano napunta si Sister Luna sa lugar na iyon, gayung alam nila na may serial killer na gumagala. Nang bigla siyang mapatingin sa kanyang paligid, ramdam kasi niyang nandu’n pa rin sa lugar na iyon ang killer. Pero siyempre, kailangan niya pa ring mag-ingat, kaya pa-simple siyang lumingon sa paligid hanggang sa ‘di kalayuan ay natanaw niya ang isang lalaking minsan niyang nakita pero hindi naalis sa kanyang isipan dahil pumasa ito sa kanyang standard, at ito ay walang iba kundi si Mark Ferrer.

Inilihis niya ang kanyang ulo nang mapagtanto niyang hindi tamang unahin ang kanyang nararamdam, dahil ang madreng napalapit sa kanya ay pinatay ng serial killer na ‘yun at wala siyang nagawa para iligtas ito.

Ngunit, ano’ng dahilan at biglang lumabas ng kumbento si Sister Luna? Hindi ba ipinagbabawal na basta-basta lumalabas ang mga madre? Hindi niya alam kung bakit bigla niyang naalala ang kakaibang titig ni Sister Luna kay Mark Ferrer habang nanlilisik ang mga mata ni Mark. Napaisip tuloy siya, what if may kinalaman talaga siya sa kamatayan ni Sister Luna?

Itutuloy…

Magdasal ka na, sister (5)

ni Maria Angela Gonzales @Kuwentong Pag-Ibig | November 6, 2023

Mababaw lang ang pagkakatulog ni Maritoni kaya nang makarinig siya ng komosyon ay agad siyang bumalikwas ng bangon. Sa secret pocket ng kanyang damit, nakalagay ang kanyang pistol. Hindi niya tiyak kung kailan aatake ang serial killer kaya kailangan niya lagi maging handa. Ngunit, susugod ba sa kumbentong ito ang mamamatay tao na iyon?

“Ano’ng nangyari?” tanong niya nang makita niyang lumabas na rin ang iba pang mga madre.

Sa pintuan kasi ng kumbento ay maririnig ang malalakas na pagkatok.

“Huwag n’yong bubuksan ang pinto!” Wika niya sa mga madre.

Ang iba ay sumunod pero ang ilan ay napatitig sa kanya, at nagtataka kung bakit siya nag-uutos sa mga ito. Umiling na lamang siya at dahan-dahang pumunta sa pintuan.

“Sino ‘yan?” Pasigaw na tanong ni Maritoni.

“Si Ka Nestor po,” sagot naman nito sa kanya.

Gusto niya na sanang sabihin na hindi niya ito kilala, ngunit nagsalita si Sister Mae, “Kapitbahay natin ‘yan.”

Really? Gusto niyang ibulalas pero hindi na niya ginawa. Kailangan niya pa ring tandaan na isang madre ang kanyang kaharap, kaya kailangan niya itong igalang. Gusto niyang matawa sa sinabi nitong ‘kapitbahay’ gayung dalawang kanto yata ang pagitan ng kumbento sa susunod na bahay.

“Hindi ka lang mag-isa,” wika pa niya, kahit hindi niya buksan ang pintuan ay alam niyang maraming nagsasalita.

“May masama kaming balita,” wika naman ng isa pa, kakaiba ang boses nito kaya sure siyang hindi ito ang tinutukoy na Ka Nestor ni Sister Mae.

“Buksan mo na ang pintuan,” pag-uutos naman ng isa pang madre na si Sister Juliet.

“Kaya maraming madre ang pinapatay, dahil ang dali n’yong magtiwala,” inis niyang bulong sa kanyang sarili, at minabuti na lamang niyang buksan ang pintuan.

“May natagpuan na namang madre na pinatay!” tugon ng mga lalaki.

Nang lingunin niya ang kanyang mga kasamahang madre, napagtanto niyang wala run’n si Sister Luna.

Itutuloy…