Magdasal ka na, sister (10)

ni Maria Angela Gonzales @Kuwentong Pag-Ibig | November 11, 2023

“What a small world,” hindi napigilang sabihin ni Maritoni. Hindi niya kasi lubos akalain na ang bahay na uupahan niya ngayon ay pag-aari pala ng isang lalaki na plano niyang imbestigahan. Nang ma-realize niyang nakatingin sa kanya ang dalawang matanda biglang gumana ang kanyang isip at napakanta siya.

“It’s a small, small world. Naalala ko ‘yang kanta na ‘yan nang magpunta kami ng parents ko sa Disneyland.”

“Hindi namin alam kung saang lupalop ang sinasabi mo, ineng.”

“Tonette po,” pagtatama niya sa sinabi ni Manang Teresita.

“Ay, pangalan ng bading,” wika naman ni Mang Roger sabay halakhak.

Bigla tuloy siyang napangiwi. Talaga naman kasing pangalan ng bading ang pangalang pumasok sa kanyang isip at kinuha niya lang ito sa pangalan ng isang beautician na walang ibang sinabi sa kanya kundi “ayusan kita”. Pakiramdam niya tuloy sa tuwing sinasabi ‘yun ng beautician ay ang pangit-pangit niya.

“Beki ho kasi ang nagpalaki sa akin,” pagsisinungaling na tugon ni Maritoni.

“Naku iha, pasensya ka na kung masyadong matabil ang dila ng asawa ko.”

“Okey lang ho, wala pong problema ru’n.”

“May bf ka na ba?” Biglang tanong sa kanya ni Mang Roger.

Hindi niya alam kung para saan ang tanong nito, ngunit buong tapang niya pa rin ito sinagot. “Naku, wala po akong panahon sa lalaki. Istorbo lang ‘yan sa buhay ko.”

“Sayang ipapakilala pa naman sana kita kay Boss Mark.”

Bago pa man niya masabi na, “sige po ipakilala n’yo ho ako sa aking future husband,” nang may biglang nagtanong kina Mang Roger at Manang Teresita na “kanino n’yo ho ako ipapakilala?”

Bigla tuloy siyang napalingon at laking gulat niya nang makita niya si Mark Ferrer. Para bang gusto niyang murahin ang kanyang sarili dahil hindi niya mapigilang matulala rito at kasabay nu’n ay ang biglang pagkabog ng kanyang puso.

Bigla tuloy siyang napaisip na kaya baka gusto niyang makilala si Mark Ferrer ay dahil gusto niyang magkaroon ng pagkakataon para magpa-cute rito.

Tumigil ka! Sawa’y niya sa kanyang sarili. Pakiramdam niya tuloy ay bigla siyang sinapian ng malanding bading, at para bang gusto niyang magpabugbog na lang para tumino siya. Kailangan kasi niyang ipaalala sa kanyang sarili na maaaring si Mark Ferrer ang serial killer na kanilang hinahanap.

Itutuloy…

Magdasal ka na, sister (9)

ni Maria Angela Gonzales @Kuwentong Pag-Ibig | November 10, 2023

“Magandang araw po,” magalang na sabi ni Maritoni sa mag-asawang kanyang kaharap.

Ito ang kailangan niyang lapitan dahil bukod sa nagpapaupa ito, rito rin malapit nakatira si Mark Ferrer.

“Magandang araw din,” sabay nilang tugon mag-asawa.

Naalala niya tuloy ang malimit na sinasabi ng kanyang lola noon, kapag ang babae at lalaki ay malimit na nagkakasabay sa paglalakad o pagsasalita – malaki ang tendensiya na sila ang itinakda ng kapalaran na magsama habambuhay.

“Gusto ko po sanang mangupahan dito,”

“Aba'y sige. Gaano mo katagal gustong mangupahan dito?” Tanong ng matandang babae na nagngangalang Manang Teresita.

“Three months po,”

“Ang bilis naman,” kunwaring nagrereklamong sabi ni Manong Roger.

“Magsusulat lang po kasi ako kaya napadayo ho ako rito,” pagsisinungaling na sagot ni Maritoni.

“Ah, manunulat ka?”

“Oho.”

“Sa dami ng lugar dito sa ‘Pinas, mabuti na lang ay dito ka sa Sitio Madasalin napadpad.”

“Maganda rin naman po rito,” nahagilap niyang sabihin.

“At nakakatakot.” Gilalas na sabi ni Manong Roger.

“Bakit naman ho?” Kunwa’y balewala niyang tanong.

“Hindi mo ba nabalitaan ang nangyayari sa aming nayon?”

“Masyado ho kasi akong naka-concentrate sa mga eksenang isinusulat ko. Ano po bang ibig n’yong sabihin?”

“Marami na kasing mga madreng pinapatay rito.”

Kunwa'y nagulat siya sa sinabi nito sabay bigkas ng “puro ho madre?!”

“Oo. Halatang galit na galit ang kriminal na ‘yun sa mga madre.”

“Bakit ho kaya?”

“‘Yan ang hindi pa nagagawa nitong si Teresita ang makipaghuntahan sa isang kriminal.” Natatawang sabi ni Mang Roger.

“Pero, alam mo ba, sinabi ng amo namin na magkikita sila dapat ni Sister Luna dahil may importante silang pag-uusapan pero hindi ito natuloy.”

“Talagang hindi matutuloy iyon dahil pinatay na si sister bago pa sila nagkita ng amo namin.”

Kumunot ang kanyang noo, at hindi niya alam kung bakit parang may nag-uudyok sa kanya na alamin kung sino ang amo ng mga ito.

“Eh, sino ho ba ang amo n’yo?” Wika niya, sabay tingin sa mag-asawa.

Matagal sumagot ang mga ito, at maya-maya ay sabay nitong binigkas ang pangalan ng kanilang amo. “Si Mark Ferrer.”

Itutuloy…

Magdasal ka na, sister (8)

ni Maria Angela Gonzales @Kuwentong Pag-Ibig | November 9, 2023

Hindi napigilan ni Maritoni ang mapahagikgik nang pagmasdan niya ang hitsura ni David o aka Sister Divina. Talaga naman kasing bagay na bagay sa kanya ang pagiging babae.

Nais kasi niyang malaman ang tunay na pagkatao ni Mark Ferrer kaya kailangang mapalapit siya rito. Siyempre, hindi niya magagawa iyon kung isa siyang madre. Kaya, kailangan niya muling magpanggap para makahagilap ng impormasyon tungkol sa pagkatao nito. Kailangan niya ring malaman kung mayroon na ba itong asawa, anak, at naniniwala ba ito sa kasal o hindi?

At bigla siyang natigilan, hindi lang naman kasi mga ganu’ng impormasyon ang dapat niyang malaman. Kailangan din niyang malaman kung nagkaroon na ba ito ng first kiss o aktibo ba ito sa…

Hindi na niya nagawang ituloy ang sinasabi ng kanyang isip dahil parang may kamay na bumatok sa kanya, at bigla siyang natauhan. Kailangan niya kasing malaman ang family background, matino ba ang kaisipan nito o may kakayahan ba itong pumatay.

Sa tingin kasi niya ay may kinalaman ito sa pagkamatay ni Sister Luna. Ang problema nga lang ay wala siyang matibay na ebidensya. Kaya, kinakailangan na niya na ang tulong ni David para maisagawa ang kanyang pinaplano.

Kahit kasi pinagdududahan siya nito, mas maigi pa ring mayroon siyang tagapagtanggol dito at ‘yun ay walang iba kundi si David.

“Paniwalang-paniwala sila sister na isa kang babae!” Wika niya sabay hagikgik.

“Siyempre, maganda ako eh.” Pagmamayabang na tugon nito.

“Hindi na kita kokontrahin dahil baka magbago pa ang isip mo.”

“May kinatatakutan ka rin pala?” Sarkastikong tanong ni David.

“Of course! Una naru’n sa listahan ay si chief. Panigurado kasing malalagot ako kapag nalaman nilang pinalitan mo ako. Pero promise, sandali lang ito. Kailangan ko lang talagang malaman kung ano ang pagkatao ng lalaking ‘yun.”

Pagkaraan ay nag-flash sa kanyang isipan ang mga madreng pinatay na humihingi ng tulong, at nagmamakaawang bigyan sila ng hustisya.

Itutuloy…