Magdasal ka na, sister (16)

ni Maria Angela Gonzales @Kuwentong Pag-Ibig | November 17, 2023

Hindi nagawang tanggihan ni Mark si Tonette (Maritoni) nang sabihin nitong du’n muna siya sa bahay na inuupahan nito. Sa tingin kasi niya ay kailangan nito ng kausap kaya makabubuti kung du’n muna siya.

“Hindi ka ba nalulungkot na wala kang asawa?” tanong sa kanya ni Tonette.

“Sino naman ang nagsabi sa iyo na wala akong asawa?”

Bigla siyang natigilan at sabay tanong na,“so, may asawa ka na?”

Dati, kapag may nagtatanong kay Mark kung mayroon na ba siyang asawa, ang lagi niyang sinasagot ay oo. Pero ngayon, hindi niya napigilan ang kanyang sarili na umiling. Pakiramdam kasi niya ‘yun ang mas mabuti niyang gawin. Saka, hindi naman siya kasal kaya technically, wala talaga siyang asawa.

Ngumisi naman ito sabay sabing, “mabuti naman kung ganu’n.”

“Bakit mabuti?” kunwa’y nagtataka niyang tanong kahit alam naman niya ang sagot.

“Sa panahon kasi ngayon, badtrip ang pagkakaroon ng karelasyon, kaya mas maiging huwag ka na lang mag-dyowa. Tunay ngang masarap ang magmahal, pero napakasakit kapag niloko ka ng taong mahal na mahal mo at ipagpalit sa…” Marahas na buntong hininga ang pinawalan nito bago niya sabihin ang huling kataga na, “iba.”

“Broken hearted ka na ba?”

“Hindi pa nga ako nagkakaroon ng dyowa, eh! Kumbaga, no boyfriend since birth pa ako.”

Kumunot ang noo ni Mark sa sinabi nito. “Sa ganda mong ‘yan? Wala ka pang nabibihag?”

Bigay na bigay ang pagtawa ni Tonette, at kitang-kita sa kanya ang kaligayahan habang nagniningning ang kanyang mga mata.

“Huwag mo ‘kong bolahin. Baka maniwala ako sa’yo. Crush pa naman kita,” wika nito saka biglang natigilan.

Maski si Mark ay natigilan din. Hindi niya kasi akalain na makakarinig siya ng ganu’ng salita mula sa kanyang tenant.

Nang una niya kasing makita si Tonette, feeling niya masikreto itong tao. Ngunit, nang mapatingin siya sa kamay nito, naunawaan niya kung bakit nagkaroon ito ng lakas ng loob para sabihin ang kanyang nararamdaman. Mayroon nga pala itong hawak na lata ng alak dahilan para masabi niya ang nilalaman ng kanyang puso.

Itutuloy…

Magdasal ka na, sister (15)

ni Maria Angela Gonzales @Kuwentong Pag-Ibig | November 16, 2023

“Kung magsalita ka naman ay parang ang laki ng galit mo sa mga taong relihiyoso.”

Pagkaraan ay natigilan siya. Ito na ba ang hinahanap niyang clue? Tanong pa niya sa kanyang sarili.

“Ang sabi ko sa mga taong panay ang punta sa simbahan,” natatawang sabi ni Mark.

Napakurap-kurap naman siya habang nakatingin rito. Para kasing may kasiyahan siyang nakikita sa mga mata ni Mark na hindi niya maipaliwanag. Hindi naman takot ang kanyang nararamdaman sa mga sandaling iyon, bagkus ito ay saya.

“Curious lang ako. Sa palagay mo, ano bang dahilan at pinapatay ang mga madre?” nahagilap niyang itanong dito.

Biglang nawala ang ngiti sa labi ni Mark, at napalitan ito ng galit. “Malamang may nagawang kasalanan ang mga madreng kanyang pinapatay.”

“Ano naman kaya iyon?”

“Hindi ako ang makakasagot niyan, kundi ang mga awtoridad. Bakit ba bigla kang nagkainteres?” wika nito.

“Siyempre, manunulat ako. Naghahanap ako ng bagong ideya para sa bago kong nobela,” sagot niya.

Ayaw niya magkaroon ito ng hinala sa kanya. Kapag nalaman nitong nagpapanggap lang siyang manunulat ay sigurado masasakal siya nito. Iyon nga lang, kahit na ano'ng gawin niya sa pagkatao ni Mark parang hindi niya nakikita na mayroon itong kakayahang pumatay. Hindi niya pa naman kasi ito nakikitang magalit. Sa puntong iyon ay parang gusto niyang pagtawanan ang kanyang sarili. Kung umasta kasi siya ay para siyang isang baliw na nakikipagtalo sa kanyang sarili.

Hindi naman kasi sapat ang mga narinig niya kay Mark para tuluyan na niya itong paghinalaan.

Kaya, mas maiging palalimin pa niya ang pagkilala rito.

Ngunit, ang layunin nga ba talaga niya ay kilalanin ang serial killer o baka naman may iba pang dahilan? Nanunudyo niyang tanong sa kanyang sarili habang lumalakas nang lumalakas ang pintig ng kanyang puso.

Itutuloy…

Magdasal ka na, sister (14)

ni Maria Angela Gonzales @Kuwentong Pag-Ibig | November 15, 2023

“Parang ang lalim ng iniisip mo, ah?” Wika ni Maritoni habang papalapit kay Mark Ferrer.

Ito na kasi ang hinihintay niyang pagkakataon para makapag-usap sila. Gusto niyang imbestigahan ang pagkatao nito, ngunit aalamin muna niya ang istorya nito.

“Tonette…” nakangiting tugon ni Mark.

Napangiwi siya sa itinawag nito sa kanya. Pakiramdam niya tuloy ay isa siyang bakla. Kung bakit ba naman kasi sa dami ng pangalan ay iyon pa ang naibulalas niya.

“Ikaw yata itong may problema, eh.” Natatawang sabi nito.

“Nami-mental block lang ako.”

“Ayan naman ang laging ikinakat’wiran ng mga manunulat kapag tinatamad sila.”

“Ikaw ba, rito ka lang?” Nahagilap niyang tanong.

“I mean, wala ka bang trabaho?” Dagdag pa nito.

“Tulad mo, Mass Com din ang course ko.” Sagot naman ni Mark.

Gusto sanang sabihin ni Maritoni na ang kanyang course ay Criminology at hindi Mass Com. Buti na lang ay mas umiral ang katinuan ng kanyang isip sa mga sandaling iyon.

“Nagsusulat ka rin?”

“Hindi, mas komportable ‘pag sa bahay lang.”

Napahagikgik naman siya sa sinabi nito gayung lumang joke na iyon. Kung maririnig lang ni David ang pinag-uusapan nila, tiyak na magrereklamo ito. Ni ngiti kasi ay hindi niya magawa kapag humirit na ito sa kanya ng kakornihan.

“Pero, iba si Mark” wika niya sa kanyang sarili. Nang tanungin niya ang sarili kung bakit iba si Mark agad naman niya itong sinagot na bantay siya rito eh. Kaya, kailangan niyang magpanggap na nasisiyahan kahit na kakornihan dito.

“Wala ka bang boyfriend?”

“Naku, wala.”

“Sa ganda mong ‘yan?”

“Malabo ba mata mo?” Tanong niya rito.

Hindi dapat siya kiligin sa mga simpleng banat nito pero iyon ang nangyari.

“Napakalinaw ng mata ko para makita ang kagandahan mo.”

“Bolero ka rin pala.”

“Hindi pambobola ang pagsasabi ng katotohanan,” wika nito sabay titig sa kanya.

Makalipas ang ilang sandali, napabuntong hininga siya sabay sabing, “subalit hindi ako maniniwala kapag may lumapit sa akin at sinabing

mamahalin niya ako. Hindi ako maniniwala dahil karamihan sa mga babae ay manloloko.

Madalas sa mga babaeng panay ang punta sa simbahan, sila pa ang ‘di mapagkakatiwalaan” wika nito habang nanlilisik ang kanyang mga mata.

Itutuloy…