Magdasal ka na, sister (25)

ni Maria Angela Gonzales @Kuwentong Pag-Ibig | November 26, 2023

Bumilis ang tibok ng puso ni Maritoni. Paano niya ba naman kasi hindi mararamdaman ‘yun? Kung para siyang kinuryente. Walang hawak si Mark nang halikan siya nito, pero milyun-milyong boltahe ng kuryente ang kanyang naramdaman.

“Bakit mo ako hinalikan?” Kabadong tanong ni Maritoni.

Hindi niya maintindihan kung ano ang kanyang nararamdaman nang maghiwalay ang kanilang mga labi.

“Kasi iyon ang nararamdaman ko.”

“Ano?” Nalilito niyang tanong.

“May gusto ako sa’yo. Ikaw, bakit ka tumugon?” Tanong nito habang nakatitig sa kanya.

Wari’y sinasabi nitong magsabi na siya ng totoo dahil buking na buking na siya nito.

“Nadala lang ako,” nahihiya niyang sagot, para tuloy gusto niyang tumakbo at magtago sa ilalim ng mesa dahil sa kahihiyan.

“Talaga?” Anitong hindi makapaniwala.

“Fine. Gusto rin kita,” sambit ni Maritoni sabay takip sa kanyang mukha.

Para kasing hindi siya ang Maritoni na kilala niya at kilala ng lahat. Si Maritoni kasi ay isang astig na babae at ang pangarap lamang niya ay manghabol at manghuli ng mga kriminal. Ngunit ngayon, ano’ng nangyari? Pakiramdam tuloy niya hinahabol siya ng…

Hindi niya na naituloy ang kanyang iniisip dahil parang may nagsabi sa kanya na hindi ito ang kriminal na kanilang hinahanap.

Napakaamo naman kasi talaga ng mukha ni Mark para isipin niyang gagawa ito ng masama. Para tuloy ibig niyang pagtawanan ang kanyang sarili dahil grabe niya kung

ipagtanggol ito. Well, tungkulin niya naman iyon bilang girlfriend.

Ganito ba talaga kapag inlab? Wait, kailangan din ba siyang magpakatanga pagdating sa pag-ibig? Hindi ah. Pero, hindi naman siguro masama kung timikim-tikim din siya ng kiss. Kaya, bigla siyang nagsalita at sabay sabing, “sige, tayo na. Kiss muna ulit.”

Itutuloy…

Magdasal ka na, sister (24)

ni Maria Angela Gonzales @Kuwentong Pag-Ibig | November 25, 2023

“Kung mayroong Dissociative identity disorder (DID) si Tonette, Sister Maritoni o kung anuman ang kanyang pangalan, hindi kaya may kinalaman siya sa patayang nagaganap?”

Tanong ni Mark sa kanyang sarili.

Ipinilig niya ang kanyang ulo, ayaw niyang isipin na may kinalaman ito sa pagkamatay ng kanyang tunay na ina. Marahas na buntong hininga ang kanyang pinawalan dahil ang ina na kanyang tinutukoy ay walang iba kundi si Sister Luna.

Kapwa nila alam ‘yun, pero minabuti na lamang nilang itago para hindi maging kahiya-hiya sa panig ng kanyang ina. Wala na rin naman siyang magagawa para baguhin ang kanyang nakagisnang buhay. Naging masaya rin naman siya sa piling ng kanyang kinilalang mga magulang bago umalis ang mga ito patungong Japan para sana magbakasyon. ‘Yun nga lang ay hindi na ito nakabalik dahil ang sinasakyang eroplano nito ay nag-crash. Kaya, sinunod na lamang niya ang kagustuhan ng mga ito na makipag-ayos sa kanyang ina.

Nakalulungkot lang na kakaayos palang nila ay nawala na agad ito. Kahit na lumaki siyang may kinikimkim na sama ng loob sa tunay niyang ina, hindi rason ‘yun para pigilan niya ang kanyang sarili na maghanap ng katarungan para rito.

“Si Tonette ba? No!” Mariin niyang sabi sa kanyang sarili.

Kahit na mayroon itong DID, sigurado siyang wala itong kakayahang pumatay. Nakilala rin naman niya si Chelsea at hindi naman ito masama. Para ngang naghahanap lang ito ng atensyon. Kaya nga lang, baka mayroon pa itong ibang katauhan na ‘di niya pa nakikita.

“Bakit ba ganyan ka kung makatingin sa akin?” Naaasiwang tanong sa kanya ni Tonette.

“Ang ganda mo kasi eh,” hindi niya napigilang sabihin.

Bigla namang namula ang mukha nito kaya hindi niya rin napigilang matawa. “Huwag mo nga akong bolahin.”

“Hindi naman kita binobola.”

Tinitigan niya ito dahil nais niyang makita nito kung gaano siya kaseryoso sa kanyang sinabi.

Pagkaraan, hindi niya na napigilan ang kanyang sarili, hinalikan niya ito para ipadama kay Tonette ang kanyang damdamin.

Itutuloy…

Magdasal ka na, sister (23)

ni Maria Angela Gonzales @Kuwentong Pag-Ibig | November 24, 2023

“Ano na ba ang nangyayari sa pag-iimbestiga mo?” Naiinis na tanong ni David kay Maritoni.

Paano ba naman kasi hanggang ngayon ay kailangan pa rin niyang magsuot ng damit pangmadre.

“Wala akong nakitang mali kay Mark Ferrer,” matabang niyang sagot dito.

Dapat sana’y masiyahan siya dahil tunay ang pagiging mabait at matulungin ni Mark at ‘yun din ang dahilan kung bakit nahulog ang kanyang loob dito. Nitong nakaraang araw ay naging super sweet ito sa kanya. Talagang pinapakita nito na karapat-dapat itong mahalin, ipinaparamdam din nito sa kanya na isa siyang babae na dapat alagaan at pahalagahan.

“Naglalakbay na naman sa kung saan ang utak mo,” inis na pansin sa kanya ni David.

“Magla-landing ba ‘yan sa Mark Ferrer na ‘yun? Baka nakalimutan mo na ang misyon mo?” Dagdag pa ni David.

“Hindi,” wika niya, pero hindi na niya alam kung ano nga ba ang dapat niyang gawin.

Basta ang alam niya ay masaya ang kanyang puso.

“Huwag kang basta nagtitiwala sa kung sino,” inis na payo sa kanya ni David.

“Nagseselos ka ba?” Natatawa niyang tanong sa kanyang partner.

“Kung sasabihin ko bang oo, may mangyayari ba? Wala naman ‘di ba? Kaya, huwag ka na magtanong. Basta, hindi ka maaaring mainlab hangga’t hindi pa natatapos ang misyon mo,” wika pa nitong pinakadiinan ang nangyari.

“Huwag mong hayaan na mangyari ulit ang nakaraan.”

“Pero, hindi ang serial killer ang may gawa nu’n,” sabi niya pagkaraan kahit pinatay din naman ang huling madre. ‘Yun nga lang ay hindi iyon natagpuan sa Sitio Madasalin.

“Iba ang paraan niya ng pagpatay, hindi ganu’n kabrutal.” Humagalpak ng tawa si David.

“Hindi mo ba naisip na nililito niya lang tayo?” Nakuha niyang itanong pero ang tanong na iyon ay galing kay Mark. Pakiramdam niya tuloy may alam ito sa mga nangyayari.

Itutuloy…