Magdasal ka na, sister (28)

ni Maria Angela Gonzales @Kuwentong Pag-Ibig | November 29, 2023

Kumunot ang noo ni Mark dahil hindi niya makita ang paborito niyang t-shirt. Niyaya niya kasing umalis si Maritoni, at ‘yun ang gusto niyang gamitin dahil may magandang nangyayari sa kanya sa tuwing ‘yun ang kanyang suot. Baka kasi ngayon na masagot kung sino ba talaga ang tunay na salarin sa pagkamatay ng kanyang ina.

“Talaga bang si Maritoni ang iyong pinaghihinalaan? O baka naman gusto mo lang siyang maka-date?” Tanong niya sa kanyang sarili.

Bahagya siyang umiling. Napabuntong hininga na lamang siya nang mapagdesisyunan niyang pumili na lang ng ibang damit, agad na siyang umalis pakiwari niya kailangan na niyang makita si Maritoni para makampante siya. Ngunit, napasimangot ito nang makita niyang nilalabas ni Maritoni ang kanyang mga gamit.

“Aalis ka na?” Gilalas niyang tanong.

“Yes. Sorry hindi ko agad nasabi sa’yo.”

“Paano na tayo?” Nagpa-panic na tanong niya.

Alam niya kasing babalik na ito sa Manila, hindi niya na malalaman ang mahahalagang detalye sa buhay nito, at tuluyan na rin silang magkakalayo.

Hindi gugustuhing mangyari ‘yun ni Mark, kaya hangga’t maaari sasama ito sa dalaga.

“Mag-ano ba tayo?” naguguluhang tanong nito sa kanya.

“Magkarelasyon, nagmamahalan tayo, ‘di ba?” Sagot niya.

Nang makita niyang kumislap sa kasiyahan ang mga mata nito ay hindi niya maiwasan

ang makaramdam ng tuwa. Pero pagkaraan ay bumuntong hininga ito.

“Sasamahan kita.”

“Hindi puwede.”

“Alam ko na ang tunay na trabaho mo, sinabi na sa akin ni Chelsea.”

“Sino si Chelsea?”

“Hindi mo alam naka-dual personality mo si Chelsea? Ngayon alam mo na kaya sasama ako sa ayaw at sa gusto mo.”

“Mr. Ferrer, nais namin kayong anyayahan sa presinto para sa ilang mga katanungan,” wika ng isang boses sa likuran at nanggilalas siya nang makakita siya ng pulis.

Itutuloy…

Magdasal ka na, sister (27)

ni Maria Angela Gonzales @Kuwentong Pag-Ibig | November 28, 2023

Uminit ang ulo ni David sa pagtatanggol ni Maritoni kay Mark. Iba kasi ang nababasa niya sa kilos nito. Kilalang-kilala niya ito, kaya alam niya kung ano ang tumatakbo sa puso’t isipan ng dalaga.

“Mukhang bilib na bilib ka sa Mark Ferrer na ‘yun, ah?”

“Nakilala ko lang siya nang husto.”

“Bumalik ka na sa pagiging madre mo.”

“Ayoko.”

“Akala ko ba may gusto kang patunayan? Nakalimutan mo na ba ‘yun? Parang sinasabi mo na rin na hindi talaga maaasahan ang mga babae sa mga misyon. Mas inuuna kasi ang puson…”

“Ano?”

“Gawin mo ang trabaho mo,”

Naningkit ang mga mata niya. Hindi niya maiwasang makaramdam ng selos. Ang tagal na niyang nagtatapat ng kanyang damdamin kay Maritoni ngunit hindi ito sineseryoso ng dalaga.

Malaki ang paniniwala ni David na hindi inosente si Mark. Kaya kinakailangan niyang kumilos para malaman niya ang katotohanan. Unang kita palang kasi niya sa lalaking iyon, alam na niyang may mali rito.

Nu’ng nakaraang araw, ‘di niya napigilang sundan si Maritoni at du’n niya nakita si Mark Ferrer.

“Kaya naman pala ayaw nang magpanggap na madre dahil may ibang gustong luhuran.”

Ang puso niya ay napuno ng matinding selos kaya hindi niya napigilang maging bastos.

Ang tipo kasi ni Mark Ferrer ay ‘yun bang nagbibilang ng dyowa, kaya kung hindi niya ibubuking ang tunay na pagkatao nito, paniguradong mapapahamak si Maritoni at hindi niya iyon gugustuhing mangyari.

“Isip…isip…isip…”

Kinakailangan niyang pag-isipang mabuti ang kanyang gagawin upang makuha niya ang taong para sa kanya. Napangisi siya sa kanyang naisip na paraan para mawala ang interes ni Maritoni rito.

Itutuloy…

Magdasal ka na, sister (26)

ni Maria Angela Gonzales @Kuwentong Pag-Ibig | November 27, 2023

“Ano na ang balita?”

Biglang napatuwid ang tindig ni Maritoni dahil sa tanong ni David. Iritado kasi ang boses nito na para bang may nagawa siyang mali.

“Wala nga ba?” Tanong niya sa kanyang sarili.

“Ano na ang nangyari kay Mark Ferrer?”

“Wala naman.”

“Hindi ba iniimbestigahan mo siya?” Gigil nitong tanong sa kanya.

Bigla siyang natigilan. Bakit parang nakalimutan na niya ang kanyang misyon? Masyado siyang inlab at nais niya muling maramdaman ang yakap at halik ni Mark. Sa tanang buhay niya, ngayon palang siya nakaramdam ng ganito, ‘yun para bang dinaduyan sa alapaap at ang bilis ng tibok ng kanyang puso.

“Ano’ng nangyayari sa’yo?” Buwisit nitong tanong.

“Saan?”

“Adik ka ba?” Inis nitong tanong.

Maaasar sana siya sa mapang-insultong pahayag ni David, pero hindi niya iyon nagawa. Sa halip, humalakhak pa siya ng buong lutong.

“Sobra ka naman sa akin, para namang hindi tayo mag-partner niyan.”

“Napag-aralan mo na ba ang pagkatao ni Mark Ferrer?” Asar nitong tanong sa kanya.

“Siyempre naman,” mayabang pa niyang sagot.

Parang gusto niyang ibahagi sa kanyang partner at matalik na kaibigan ang kanyang nararamdaman. Gusto sana niyang sabihin dito na inlab na siya, ngunit naalala niya na nililigawan din pala siya nito.

“Huwag kang mag-alala, hindi siya ang kriminal na hinahanap natin.”

“Kung ganu’n, eh ‘di maging madre ka na ulit!” Matapang nitong sabi kaya natigilan siya.

Ang talim kasi ng tingin nito at para bang gusto siyang sakalin. Bigla tuloy siyang kinabahan. Para kasing pinipigilan lang nito ang kanyang galit, at hindi niya alam kung para kanino iyon.

“Para sa akin ba?” Tanong nito sa kanyang sarili.

Itutuloy…