Bebot, problemado dahil ama ng pinagbubuntis, wa’ na paki

ni Sister Isabel del Mundo - @Mga kuwento ng buhay at pag-ibig | December 4, 2023

Dear Sister Isabel,

Isa akong bilanggo. Hindi alam ng asawa’t anak ko na narito ako sa bilibid. Ang akala nila ay patay na ako. Ang nangyari tuloy, makalipas ang limang taon na wala akong contact sa misis ko, nag-asawa siyang muli. Masakit sa aking kalooban, pero tinanggap ko na rin.

3 years na ang nakakalipas mula nang magkaroon siya uli ng bago, nabigyan ako ng parole.

Makakalaya na ako sa susunod na buwan. Gulung-gulo ang isip ko kung paano ako makakabalik uli sa pamilya ko para makapiling sila.

Ano ang dapat kong gawin? Balita ko ay masaya naman sila sa piling ng kanilang bagong tumatayong ama. Sana ay mapayuhan n’yo ako sa kung ano ang dapat kong gawin.

Umaasa,

Bert ng Mindoro

Sa iyo, Bert,

Isang mapagpalang araw sa iyo. Sana gabayan ka ng Diyos sa muli mong paglaya. Medyo komplikado ang problema mo, pero dapat mo itong tanggapin. Hindi mo masisisi ang asawa mo kung may iba na siya. Ang mahalaga maayos ang buhay nilang mag-iina at masaya sila sa ipinalit ng asawa mo. Sadyang ganyan ang tadhana, ‘di natin alam ang nakatakda. Gayunman, makabubuting makipagkita ka sa asawa’t anak mo.

Kung anuman ang kalabasan, tanggapin mo nang maluwag sa iyong kalooban. Kung pabor sa iyo, mas mainam. Kung hindi naman, pag-usapan n’yong mabuti ang dapat mong gawin upang maging maayos ang lahat. Naniniwala akong mauunawaan din nila ang mga pangyayari. Magiging maayos din ang lahat. Wala namang bagay na ‘di nasosolusyunan kung haharapin ito nang maayos at bukas ang puso’t isipan. Diyos lamang ang nakakaalam, basta’t dumulong ka lang sa kanya. Manalangin at magdasal ka sa Dakilang Kataas-taasan bago mo puntahan ang pamilya mong napawalay sa iyo.

Sumaiyo nawa ang gabay ng banal na espiritu upang muli kang lumigaya.

Sumasaiyo,

Sister Isabel del Mundo

Magdasal ka na, sister (30)

ni Maria Angela Gonzales @Kuwentong Pag-Ibig | December 1, 2023

Panganib, ‘yun agad ang nag-flash sa kanyang isip kaya agad niyang pinrotektahan si Mark, at hindi niya hahayaang may mangyaring masama rito. Mahal niya ito kaya poprotektahan niya ito sa abot ng kanyang makakaya. At saka wala namang kaso si Mark. Kaya, agad niyang kinuha ang kamay nito at itinakbo. Nakasisigurado kasi siya kung mananatili sa lugar na iyon si Mark, maaari itong masaktan.

“Baka mas lumala ang sitwasyon ko kapag tumakas ako?” Buong pag-aalalang tanong ni Mark.

“Kapag hindi kita tinakas, maaari kang mamatay.”

Naisip ni Maritoni na magpunta sa kumbento para ru’n magtago. Makatitiyak siyang mas safe kung du’n sila mananatili. Ang problema lang kahit ilang ulit na silang kumatok ay walang nagbubukas sa kanila.

Dahil doon, bigla siyang kinabahan. Matinding kaba ang agad niyang naramdaman.

Parang sinasabi nito may hindi magandang mangyayari. Kahit naman kasi kumbento ito hindi pa rin niya masasabi na dapat tahimik ito lalo pa’t ala-6 na ng gabi. Kapag ganu’ng oras kasi ay dapat may mga naririnig na siyang nagdarasal, pero wala siyang naririnig kaya ru’n na siya mas lalong kinabahan.

Humigpit lalo na ang hawak niya kay Mark. Hindi niya kasi hahayaan na may mangyari rito, pero palagay niya, kilala na niya ang serial killer. Iyon lang kasi ang naisip niyang maaaring gumawa sa kanya ng kasamaan.

“Bakit?” “Shhh…. May kalaban,” wika pa niya.

At nang lumapit sila sa dinadasalan ng mga madre, nanggilalas siya dahil nakita niyang nakabulagtang duguan ang mga ito.

Itutuloy…

Magdasal ka na, sister (29)

ni Maria Angela Gonzales @Kuwentong Pag-Ibig | November 30, 2023

“Natagpuan ito malapit sa pinangyarihan ng krimen nu’ng nakaraang araw,” mariing sabi ng pulis na si SPO1 Donato Sippon.

Seryoso man ang usapan, hindi nakaligtas sa paningin ni Maritoni ang palagiang pagsinghot nito na para bang gustong awatin ang pagtulo ng sipon.

“Iyo ito, hindi ba?”

“SPO1 Sippon, bakit parang alam na alam mong kay Mark ‘yan? Ikaw ba ang nagregalo?” Asar niyang tanong. Nakatitiyak siyang hindi pag-iimbestiga ang ginawa nito kundi pang-aakusa.

“Saka bakit sa dinami-rami ng tao rito sa Sitio Madasalin…”

“Akin nga ‘yan, pero nawala ‘yan kahapon. Iyan nga sana ang isusuot ko ngayon.”

“Gusto mo bang sabihin na may pumasok pa bahay mo para kunin lang itong damit mo?”

“Baka naman iyon talaga ang nangyari?” Inis na sagot ni Maritoni kay SPO1.

“Bakit parang kinakampihan mo pa ang isang kriminal?” Galit nitong tanong.

Naningkit ang mga mata niya. Unang kita pa lang niya sa SPO1 na ito, wala na siyang tiwala. Para kasi ito ang tipo ng pulis na ipagbibili ang karangalan para lamang sa pera.

“Nakakasigurado ka bang siya ang gumagawa ng krimen dito?” Buwisit niyang tanong.

“Kanina ka pang babae ka ah?!” Napipikong sagot ni Sippon.

Bigla itong tumayo at parang gusto siyang tutukan ng baril, pero mabilis din niyang nadukot ang kanyang wallet na may chapa.

“Ma’am?” gulat nitong bulalas.

“Hindi ko palalampasin itong ginawa mo,” mariing sabi niya.

Ninerbiyos naman ito na wari'y hindi malaman ang gagawin.

“Napag-utusan lang naman po ako.”

“Sino’ng nag-utos sa’yo?” Pagtatanong niya.

Ngunit, bago pa man siya sagutin nito, bumulagta na ito at duguang bumagsak!

Itutuloy…