Alamin: Paraan upang makautang ang mga pensiyunado sa SSS

@Buti na lang may SSS | June 6, 2021

Dear SSS,

Ako ay pensiyunado ng SSS. Kamakailan ay nabalitaan ko na mayroong pautang ang SSS para sa aming mga pensiyunado. Paano ba mag-apply dito? – Lola Chichay, Antipolo City

Sagot

Mabuting araw sa iyo, Lola Chichay!

Totoong may pautang ang SSS para sa mga retiree pensioners nito o retiradong pensiyunado. Ito ay ang Pension Loan Program (PLP). Layunin ng PLP ang makapagbigay ng tulong-pinansiyal sa mga retiradong pensiyunado ng SSS sa pamamagitan ng pautang na may mababang interest. Batid nating sa panahong ito na nasa gitna tayo ng pandemya ay kailangan ninyo ng karagdagang financial assistance para sa inyong mga pangangailangang-medikal para sa inyong maintenance, atbp.

Ito ay upang maiwasan din ang pagsasangla ng ATM cards ninyo, Lola Chichay sa ating mga private lending institutions na ginagawa ng ating mga pensiyunado bilang kolateral para sa lubhang napakataas na interest na may mas mahabang loan term o pagbabayad.

Upang makahiram sa ilalim ng programang ito, kinakailangang matugunan ninyo ang sumusunod na mga kondisyon:

• hindi dapat hihigit sa 85-anyos sa katapusan ng termino ng pautang;

• walang ibinabawas sa kanyang buwanang pensiyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS;

• walang utang sa ilalim ng SSS Calamity Assistance Package; at

• tumatanggap na ng regular na pensiyon na hindi bababa sa isang (1) buwan.

Halimbawa, nag-apply kayo ngayong June 2021, ang simula ng inyong pagbabayad ay sa Agosto 2021.

Samantala, para sa mga first-time applicants, Lola Chichay, ito ay kinakailangang i-file sa pamamagitan ng drop box system. Para sa renewal naman, ito ay maaari nang i-file sa pamamagitan ng online. Kinakailangan lamang na kayo ay nakarehistro sa My.SSS na matatagpuan sa SSS website, www.sss.gov.ph. Hinihingi rin naming ang inyong contact number o aktibong mobile number, kabilang ang iyong SSS UMID-ATM o kaya’y ang UnionBank Quick Cash Card para rito.

Mag-log in kayo sa inyong My.SSS account at magtungo kayo sa E-Services tab kung saan makikita ninyo ang “Apply for Pension Loan.” I-click ninyo ito upang simulan ang iyong aplikasyon. Sunod, piliin ang halaga ng iyong uutangin at kung gaano mo ito katagal babayaran. Sa kasalukuyan, makahihiram kayo ng hanggang P200, 000 bilang maximum loanable amount na maaaring bayaran hanggang 24 months o dalawang (2) taon. Matapos nito, i-click ang “I agree sa mga terms and conditions of the program.”

Maaari naman ninyong i-download o i-print ang kopya ng Disclosure Statement. Makatatanggap na kayo ng kompirmasyon sa pamamagitan ng e-mail o text tungkol sa iyong aplikasyon.

Papasok ang halaga ng iyong inutang sa inyong UMID-ATM o UnionBank Quick Cash Card. Sa pagkakataong kinakailangan n’yo ng tulong hinggil sa inyong aplikasyon, maaari ninyong ipakisuyo ito sa inyong apo o anak na marunong sa computer.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Bakit hindi pensiyon ang natanggap ko sa aking retirement benefit?

@Buti na lang may SSS | May 31, 2021

Dear SSS,

Kamakailan ay nag-file ako ng aking retirement claim at ang natanggap ko ay lump sum amount. Batay sa rekord ng SSS, ako ay nakapaghulog ng 100 buwanang kontribusyon. Nais kong itanong kung bakit hindi pensiyon ang natanggap ko sa aking retirement claim? – Tomas ng Rodriguez, Rizal

Sagot

Mabuting araw sa iyo, Tatay Tomas!

Ang benepisyo sa pagreretiro o ang retirement benefit ay ipinagkakaloob ng SSS sa miyembrong umabot na sa retirement age. Ang karaniwang retirement age ng mga manggagawa ay 60 taong gulang. Subalit, ang edad ng pagreretiro ay 55 taong gulang para sa mga professional racehorse jockey o hinete at 50 taong gulang naman para sa mga underground at surface mineworker o mga minero.

Dalawang uri ang pagbabayad ng benepisyo sa pagreretiro. Ito ay ang buwanang pensiyon o lump sum benefit kung saan ang ibibigay sa retiradong miyembro ay naaayon sa bilang ng naihulog niyang kontribusyon.

Kung nakapaghulog ng hindi bababa sa 120 buwanang kontribusyon bago ang semestre ng pagreretiro, makatatanggap ang miyembro ng buwanang pensiyon. Ang lump sum benefit naman ay ibinibigay kapag hindi umabot sa 120 buwan ang naihulog ng miyembro.

Sa iyong kaso, Tatay Tomas ay tama lamang na lump sum benefit ang iyong natanggap bilang inyong retirement benefit dahil hindi ninyo natugunan ang isa sa pangunahing kuwalipikasyon upang makatanggap ng buwanang pensiyon dahil hindi umabot sa 120 buwanang kontribusyon ang naihulog ninyo sa SSS bago ang inyong pagreretiro.

Kaya, mahalagang i-check ng miyembro na magreretiro kung sapat na ang naihulog niya upang makatanggap ng buwanang pensiyon mula sa SSS. Sa ngayon, madali ng i-monitor ang naihuhulog nila sa SSS sa pamamagitan ng pagrerehistro at paggawa ng kanyang sariling My.SSS na matatagpuan sa SSS website.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Paano maging miyembro sa SSS ang mga self-employed?

@Buti na lang may SSS | May 23, 2021

Dear SSS,

Nabasa ko kamakailan sa inyong pitak na maaaring maging miyembro ng SSS ang asawa ng miyembro na walang trabaho. Mula pa noong una ay hindi ako namasukan o nagtrabaho sa kumpanya kaya hindi ako naging miyembro ng SSS. Sa kasalukuyan ay mayroon akong mini grocery store. Kaya nais kong malaman kung maaari ba akong makapaghulog sa SSS? – Sonya ng Marilao, Bulacan

Sagot

Mabuting araw sa iyo, Sonya!

Malugod naming ipinaaalam sa iyo na maaari kang maging miyembro ng SSS. Mula pa noong 1980 ay itinatakda ng SSS Law ang pagsakop sa mga self-employed na indibidwal na may buwanang kita na P1, 000 o higit pa mula sa kanyang sariling negosyo o propesyon at walang employer, kung hindi pa siya tumutuntong ng 60-anyos.

Kabilang sa mga self-employed ay propesyunal tulad ng abogado o doktor, may sariling opisina man o wala, mga nagmamay-ari o magkasosyo sa negosyo, mga artista, direktor o manunulat ng pelikula na hindi itinuturing na empleyado, mga propesyunal na atleta, coaches, hinete at tagapagsanay, magsasaka at mangingisda, mga nagtitinda sa palengke, tricycle o jeepney drivers, o contractual at job order na empleyado na nagtatrabaho sa mga ahensya ng pamahalaan.

Sa kasalukuyan, ang contribution rate ay 13% ng monthly salary credit na hindi hihigit sa P25, 000. Maaaring ibatay ang halaga ng iyong magiging buwanang kontribusyon sa monthly salary credit o ang salary level kung saan nakabase ang buwanang kita na sa registration form o SS Form E-1 (Personal Record). Ang SSS Schedule of Contributions ay makikita sa SSS website, www.sss.gov.ph o kaya’y sa Facebook page ng SSS, sa Philippine Social Security System.

Samantala, ang buwanang kontribusyon ng self-employed ay maaaring tumaas o bumaba sa idineklara sa registration form ayon sa kanyang aktuwal na kinita at hindi na kailangang ng anumang patunay tungkol dito.

Halimbawa, Sonya, ang idineklara mong buwanang kita sa registration form ay P8, 300. Batay sa Schedule of Contributions, ito ay katumbas sa 8, 500 monthly salary credit at may kaukulang kontribusyon na P1, 105 kada buwan kasama na ang P10 para sa iyong Employee’s Compensation contributions na may kabuuang halaga na P1, 115 kada buwan.

Ang EC Program ay para sa mga work-related accidents na maaaring mangyari sa self-employed na tulad mo habang nagtatrabaho. Dagdag-proteksiyon ito bukod sa SSS benefits na matatanggap mo sa hinaharap.

Maaari ka nang kumuha ng SS number online. Magtungo lamang sa SSS website (www.sss.gov.ph) at i-click ang link sa No SS Number Yet? Apply Online! Kung ikaw ay may SS number, maaari na ring i-update ang membership sa online. Kinakailangan lang na nakapagrehistro sa My.SSS na matatagpuan din sa SSS website. Dagdag pa rito, kailangan mo rin ang mga dokumentong tulad ng certified true copy ng iyong birth certificate upang mabigyan ka ng SS number. Kung wala kang birth certificate, maaaring isumite ang alinman sa mga sumusunod: baptismal certificate; driver’s license, pasporte; Professional Regulation Commission (PRC) card; o Seaman’s Book. Kung wala ang mga nasabing cards o dokumento, maaaring magpasa ng dalawang valid ID gaya ng postal ID, school ID, senior citizen card, voter’s ID o company ID.

Matapos nito, maaari ng magbayad ng iyong kontribusyon kada buwan o kaya ay quarterly sa alinmang sangay ng SSS, sa bangko o Bayad Centers at iba pang payment channels ng SSS. Sa online, maaaring gamitin ang Moneygment sa pamamagitan ng My.SSS, PayMaya at BPI sa pamamagitan naman ng SSS Mobile App.

Mahalaga na ang miyembro ay regular na naghuhulog ng kontribusyon upang maging kuwalipikado sa mga benepisyo ng SSS para sa panganganak, pagkakasakit, pagkabalda, pagreretiro, pagpapalibing at pagkamatay gayundin sa mga pautang ng SSS tulad ng salary loan, calamity at educational assistance, atbp.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.