UAE nagbukas ng mga trabaho para sa mga OFW

ni Jasmin Joy Evangelista | November 22, 2021

Muling nagbukas ng oportunidad ang United Arab Emirates sa mga unemployed at OFW na nawalan ng trabaho ngayong pandemya.

Ayon kay Labor Attaché John Rio Bautista ng Philippine Overseas Labor Office (POLO) sa Dubai, muling kukunin ng Dubai Duty Free shops ang nasa 600 na OFW na unang tinanggal sa trabaho.

Nakipag-ugnayan din ang gobyerno ng UAE para sa panunumbalik sa trabaho ng mga OFW at ilang employer din sa nasabing bansa ang nagpahayag ng interes na kumuha ng mga Pinoy at mga health professionals.

Aabot sa mahigit 8,000 job orders para sa mga household service workers (HSW) ang natulungan na ng POLO mula noong Abril kung saan 6,000 sa kanila ang dumating na sa Dubai.