Shear line, humina, ngunit maaaring magpatuloy ang pag-ulan — PAGASA

ni Eli San Miguel - Trainee @News | November 24, 2023

Humina na ang epekto ng shear line na nagdulot ng malakas na pag-ulan sa Bicol Region at Eastern Visayas sa nakalipas na mga araw, ayon sa Philippine Atmospheric, Geophysical and Astronomical Services Administration (PAGASA) ngayong Biyernes.

Tinuturing ang shear line bilang weather system na nabubuo sa pagsasanib ng cold northeasterly winds at warm easterly winds.

Gayunpaman, sinabi ni PAGASA weather specialist Aldczar Aurelio na maaaring magpatuloy ang shear line at easterlies sa pagdala ng scattered rain showers at thunderstorms sa Aurora, Quezon, Oriental Mindoro, Marinduque, Romblon, Bicol Region, Aklan, Capiz, Northern Samar, Eastern Samar, Dinagat Islands, Surigao del Norte, Surigao del Sur, at Davao Oriental.

Nagbabala naman ang PAGASA sa posibleng flash floods at landslides sa mga lugar na ito sa panahon ng moderado hanggang malakas na pag-ulan.