May-ari ng Fila Phils... Cris Albert, pumanaw na

ni Zel Fernandez | April 25, 2022

Nagluluksa ang fashion industry sa pagkamatay ni Maricris Abad Santos Albert, mas kilala bilang Cris Albert, ang may-ari ng Fila Philippines. Kinumpirma ng shoes brand Fila sa isang Instagram post ang pagpanaw ni Cris, na ibinahagi naman ng kapatid nitong si Ana Abad Santos.

“It is with profound sadness that we announce the untimely passing on Saturday, April 23, 2022, of Fila Philippines CEO and owner, Ms. Cris Albert,” pahayag ng brand.

“Her family appeals to everyone to respect their privacy as they grieve in this time of immense loss.”

Bago pa man maging bahagi ng sports footwear brand noong 1992, ang buhay ni Cris ay umiikot na sa mundo ng fashion. Bata pa lamang ay napapanood na nito ang kanyang inang si Wanda Louwallien sa mga runway shows nito. Kalaunan, naging modelo rin ito at nagsimulang lumitaw sa hindi mabilang na mga ads at campaigns. Pagkaraang magkaroon ng sapat na exposure sa fashion industry, doon niya ipinursigi ang career sa marketing at management.

Ayon pa sa website ng Fila Philippines, umani ng maraming parangal si Cris sa mga gawa likha nito sa fashion at pagkakawanggawa. Kabilang sa mga parangal na tinanggap nito ang Ayala merchants award (2006), Dangal ng Bayan award for product and service excellence (2008), at ang Woman of Substance recognition (2021).

Mula sa pahayagang BULGAR, kami po ay nakikiramay sa mga kapamilyang naulila ni Cris Albert.