Diaz, dapat nang sumalang sa torneo para sa Olympic ticket

ni ATD - @Sports | July 10, 2020

Kailangan nang sumalang sa isang tournament si Rio Olympics silver medalist Hidilyn Diaz upang makakuha ng tiket sa Tokyo Olympics na ikakasa sa 2021.

Maliban kay Diaz ay marami pang Pinoy athletes ang sasalang sa qualifying tournament kaya posibleng madagdagan ang delegasyon ng Pilipinas sa Olympics sa Japan.

Naniniwala si Philippine Olympic Committee (POC) president Abraham "Bambol" Tolentino na malaking bilang ng atletang Pilipino ang sasabak sa nasabing quadrennial meet.

“We still have a lot of hopefuls who will be competing the Olympic qualifiers in their respective sports,” pahayag ni Tolentino.

Nakapasok na ang apat na atleta sa Olympics, ito'y sina world champion Carlos Edriel Yulo ng gymnastics, Southeast Asian Games pole vault record holder Ernest John Obiena ng athletics at sina three-time SEA Games champion at AIBA World Championships silver medalist Eumir Felix Marcial at Irish Magno ng boxing ayon sa pagkakasunod.

Umaasa rin ang POC at Philippine Sports Commission, (PSC) sa pangunguna ni chairman William "Butch" Ramirez na makakapasok sina 2019 AIBA World Championships gold medalist Nesthy Petecio at si 2018 Asian Games gold medalist Margielyn Didal ng skateboarding.