BULGAR
Dec 4, 2020
ni Oghie Ignacio - @Stars Connection | December 4, 2020
Marami sa mga kaibigan, kamag-anak at kasamahan ng radio-tv personality at host ng dating Dos Por Dos ng ABS-CBN 2 na si Anthony Taberna a.k.a. Ka Tunying ang nagulat at nagkakaisa sa panalangin para sa paggaling ng kanyang panganay na anak na si Zoey matapos ma-diagnose nu'ng nakaraang taon na may leukemia pala ito.
Kahit gaano katatag at katapang si Ka Tunying sa kanyang programa sa TV at radyo, hindi raw niya naiwasang mapaiyak nang makitang kinakalbo ang kanyang anak na si Zoey dahil kailangan ito para sa chemotherapy ng bata.
Matagal-tagal pa ang gamutan kay Zoey na aabot pa raw nang 3 yrs. pero ayon naman sa misis ni Ka Tunying na si Rossel Taberna, matindi ang kapit nila sa Diyos at hindi sila nawawalan ng pag-asa na gagaling si Zoey.
Ngayon nga raw, nakikita na nila ang unti-unting pag-okay ng kondisyon ng anak.
Kasama kaming nananalangin na sana'y malagpasan ng pamilya Taberna ang mabigat na pagsubok na ito at gumaling agad si Zoey para makabalik sa normal na buhay.