Hirit na isama si VP Leni sa IATF, sinopla ni Spox. Roque, huwaaaw!

HIRIT NI TRILLANES NA ISAMA SI VP LENI SA IATF, IBINASURA NI ROQUE — Matapos magkaroon ng sigalot ang mga opisyal ng Inter-Agency Task Force on Emerging Infectious Diseases (IATF-EID) na humantong sa pagkakasibak kay Dr. Tony Leachon bilang special adviser ng National Task Force on COVID-19 ay nanawagan si ex-Sen. Antonio Trillanes kay P-Duterte na italaga si VP Leni Robredo sa IATF-EID upang makatulong ito sa pamahalaan sa paglaban sa coronavirus.

Ang ganda ng mungkahi ni Trillanes para magkatulungan ang Duterte gov’t. at Office of the Vice-President (OVP), pero ang masaklap, wala pang sagot si P-Duterte ay nag-feeling Pangulo si Presidential Spokesman Harry Roque nang ibasura ang suhestiyon ng dating senador, boom!

◘◘◘

HANAPBUHAY ANG KAILANGAN NG MAMAMAYAN, HINDI ANTI-TERROR BILL — Iminungkahi ni military Diocese Bishop Oscar Jaime Florencio kay P-Duterte na pansamantala munang isantabi ang usapin ng Anti-Terrorism Bill dahil hindi ito ang tamang panahon para isabatas ito sapagkat sa panahon ng krisis, ang dapat tugunan ng gobyerno ay ang kahirapang dinaranas ng mamamayan dulot ng COVID-19.

Korek! Sa totoo lang, ang kailangan ngayon ng mamamayan ay hanapbuhay para muling makapagsimula sa buhay at hindi ang “Anti-Terror” Bill, period!

◘◘◘

DAPAT PA BANG I-MEMORIZE KUNG BAKIT BAD ANG TRATO NG KONGRESO SA ABS-CBN? — Bumanat si Buhay Partylist Rep. Lito Atienza ay hindi raw patas ang trato nina Rep. Franz Alvarez, chairman ng House Committee on Legislative Franchise at Rep. Jonathan Sy-Alvarado, chairman ng House Committee on Good Government sa ABS-CBN kaugnay sa hinihirit nitong prangkisa kasi hinahayaan lang ang mga kongresistang anti-Kapamilya network na siraan ito (ABS-CBN) at maikling oras lang ang ibinibigay sa kampo ng network para depensahan kanilang kumpanya.

‘Sus, dapat pa bang i-memorize kung bakit ganyan ang trato sa Dos ng dalawang komiteng ito, eh, sa una pa lang ay parang ayaw na nilang i-renew prangkisa nito, boom!

◘◘◘

ANG BANTOT NG IMAHE NGAYON NG TESDA — Dahil sa pagkakatalaga ni P-Duterte kay ex-ACT-OFW Partylist Rep. Aniceto Bertiz bilang deputy director-general ng Technical Education and Skills Development Authority (TESDA) ay lalong bumantot ang imahe ng ahensiyang ito ng gobyerno.

Mantakin ninyo, ang Director-General ng TESDA na si ret. Gen. Isidro Lapeña, nasangkot sa shabu smuggling noong commissioner pa ito ng Bureau of Customs, tapos ang deputy director-general ng ahensiya na si Bertiz ay sangkot naman sa pang-aabuso sa mga empleyado ng NAIA, buwisit!