Ka Ambo
Apr 1, 2020
Hindi malaman ng gobyerno kung paano magdedesisyon kaugnay ng COVID-19 pandemic.
Tinamaan kasi ang mismong AFP chief at DILG secretary.
Sila mismo ay hindi nakaligtas kasi hindi talaga nila alam ang “esensiya” ng krisis!
◘◘◘
NAKAKAAWA ang mga health workers na namatay dahil sa COVID-19 dahil sa “kawalang alam” ng mga awtoridad sa tunay na larawan ng epidemya.
Ngayon, hindi natin sigurado kung ititigil ang lockdown o itutuloy?
◘◘◘
AYON sa positive COVID-19 patient na si Eduardo Ano, gusto niyang itigil na ang lockdown.
Dahil guguho ang ekonomiya!
◘◘◘
KAPAG nabangkarote ang ekonomiya, guguho ang gobyerno at magbubunsod ng walang patid na kaguluhan.
Praktikal!
◘◘◘
PERO, kung ang rekomendasyon naman ni DOH Secretary Francisco Duque ay paliwigin pa ang lockdown nang isang buwan.
Dumarami ang positibo sa virus at dumarami rin ang namamatay!
◘◘◘
MALINAW na walang tamang desisyon ang gobyerno.
Ibig sabihin, alisin o hindi alisin ang lockdown, grabe pa rin ang sitwasyon!
◘◘◘
SA Germany, nag-suicide ang isang miyembro ng gabinete—dahil hindi niya malubos maisip na guguho ang ekonomiya ng kanyang bansa na pinaglilingkuran.
Ayaw niyang makita na bangkarote ang gobyerno at pribadong sector!
◘◘◘
SA US naman, pinagagamit na ang lahat ng resources military kasama na ang warships.
Pero, sa isang warships, 200 miyembro nito ay natuklasang may COVID-19.
Ibig sabihin, ang naatasang tutulong ay carrier at biktima rin!
◘◘◘
NAKAHANDA ang US government na gumastos ng $2 trillion hanggang $6 trilliong kontra COVID-19.
Pero, kapos sila ng gamit at health workers.
Paano ‘yan?
◘◘◘
BUMABALIK na sa normal ang China at batay sa balita, bubuksan na ang mga negosyo.
Pero, pinaniniwalang “bluff” lang ito!
◘◘◘
SA Pilipinas, walang maayos na direksiyon at desisyon.
Nagsisimula nang maghuramentado ang mga nagugutom sa ilang barangay sa Quezon City.
Kapag ginaya sila ng ibang lungsod o bayan, ano ang dapat gawin ng Palasyo?