CAFGU niratrat ng mga rebelde

AGUSAN DEL NORTE — Isang miyembro ng Citizens Armed Forces Geographical Unit (CAFGU) ang pinagbabaril at napatay ng mga miyembro ng New People’s Army (NPA) kamakalawa sa Bgy. Los Angeles, Butuan City.

Kinilala ang biktimang nagtamo ng mga tama ng bala sa katawan na si CAA Recto Mabasle, nakatalaga sa Army-CAFGU Patrol Base sa nasabing lalawigan.

Ayon sa ulat, habang nakatayo sa labas ng kanilang bahay si Mabasle ay biglang sumulpot ang mga NPA at agad pinagbabaril ang biktima.

Kaagad namang dinala ng kanyang mga kamag-anak si Mabasle sa ospital, pero idineklara itong dead-on-arrival.

Tinutugis na ng tropa ng pamahalaan ang mga tumakas na NPA na pumatay sa biktima.