VA
Nov 14, 2019
Nakahirit ng do-or-die game ang Far Eastern University kontra University of Santo Tomas nang burahin nila ang twice-to-beat advantage ng Tigresses sa pamamagitan ng 48-46 na panalo kahapon sa UAAP Season 82 Women’s Basketball stepladder semifinals sa Mall of Asia Arena.
Umiskor ang graduating guard na si Fatima Quiapo ng kanyang career-best na 18 puntos, 13 rebounds at 4 na steals para mapanatiling buhay ang tsansa ng Lady Tamaraws na umabot ng Finals. Nakabalikat niya ang mga kapwa beteranong sina Valerie Mamaril na nag-ambag ng 9 na puntos at 5 rebounds, Clare Castro na may 8 puntos, 15 boards at 2 blocks, at Choy Bahuyan na mayroon ding 8 puntos, 5 rebounds at 2 assists. “Sinabi ko na huwag tayo mag-iiyakan. Walo ‘yung ga-graduate sa atin at hindi puwedeng mag-iyakan tayo dahil may Game Two pa,” ani coach Bert Flores.
Lamang pa ang UST sa iskor na 43-39, mahigit 7 minuto ang natitirang oras sa laban, naglatag ang Lady Tams ng 8-0 blast para agawin ang bentahe, 47-43, may natitira na lang 1:59 sa 4th canto. Natapyas pa ni Ruby Portillo ang lamang sa isa, 46-47 sa ibinato nitong 3 point shot ngunit hanggang doon na lang ang kanilang inabot hanggang selyuhan ni Mamaril ang kanilang panalo ng split nito sa freethrow. “Sabi ko sa kanila, magpa-practice pa ba tayo? Sabi nila, oo!,” wika pa ni Flores. “Si Clare sabi rin, ‘May Sabado pa tayo!’” Namuno si Portillo para sa UST sa itinala nitong 12 puntos, 5 rebounds, 5 assists at 3 steals.