Libreng parking sa mall, pagbigyan na!

Kapag ganitong panahon, dagsa na naman ang mga tao sa mga mall — may mga namimili, namamasyal at kumakain.

 At ang isa sa madalas na isyu ng mga kostumer ay ang parking space. Kung hindi punuan, grabe naman at taga kung maningil.

 Kapansin-pansin din na magkakaiba ang rate ng parking fees ng mga mall. ‘Yung iba, umaabot pa sa mahigit P700. Pero ang mas matindi, may waiver of liability o iwas-pananagutan ang may-ari ng parking space sakaling manakaw o masira ang sasakyan ng kostumer. Talagang ang binayaran lang natin ay ang espasyo at hindi para ipagkatiwala sa kanila ang ating sasakyan. Tsk-tsk-tsk!

 Ilang panukalang-batas na ang binuo para gawing libre ang parking sa mga mall, pero hanggang ngayon ay wala pa ring umuusad. Hindi man kasing-ingay ng mga kontrobersiyal na isyu ang sa parking fee, sana naman ay may mga mambabatas pa rin tayong mapansin ang matagal nang panawagan ng mga mamimili — gawin nang libre ang parking fee!

 Hindi naman siguro kalabisan sa mga may-ari ng malls na kung bumili o kumain naman ang kostumer ay ilibre na ang parking, tutal kumita naman sila, hanapan na lang ng resibo.

 Ang maaaring singilin ay ‘yung mga tumambay at nagpalamig lang o talagang parking space lang ang ginamit.

 Sa isa pang pagkakataon, nananawagan tayo sa ating mga mambabatas na sana ay bigyang-pansin ang iba pang isyu na malapit sa taumbayan. Maaaring sa iba ay maliit na halaga ang P20 o P50 na parking fee, pero para sa marami ay malaking bagay na ito.